Romanos 6

1¿Titzun oc kma'? ¿Cucxpe ko binchal il tu'n ttzaj tk'o'n Dios nimxixtl t-xtalbil ke? 2Mi'n. Porque minti'tl tajben il ke, porque ic tza'n cyimni ko' te il. ¿Tza'ntzun tten cucx tu'n kbinchan il? 3¿Minti'pe ba'n cyu'ne, ic tza'n ke o ko byan, o ko oc mojba'n tuc'il Crist ex at koclen ti'j tcamic? 4Porque tej tcyim Crist ex cu'x maku'n, icxtzun ke tej kbyan, mer ic tza'n o ko cyim ex o ko cu'x maku'n junx tuc'il, porque o ko oc mojba'n tuc'il. Ic tza'n te Crist o jatz ank'in cyxol cyimni tu'n tipumal Mambaj, ax icxtzun ke tu'n kbet tuj ac'aj chwinklal. 5Porque ka ma ko oc mojba'n tuc'il Crist tu'n kcyim junx tuc'il, ax icx oc ko jawil ank'in junx tuc'il. 6Ba'n ku'n, aju ojtxi kten o jaw k'o'n twitz crus junx tuc'il Crist tu'n tnaj aju tipumal il tuj kximlal, tu'ntzun mi'n ktentl te tmajen il. 7Porque aju o cyim, tzokpi'majtl tjak' tipumal il. 8Ex ka o ko cyim junx tuc'il Crist, k'ukl kc'u'j ti'j ka oc ko ank'il junx tuc'il. 9Porque ba'n ku'n o jaw ank'in Crist cyxol cyimni, mlay cyimtl; minti'tl toclen camic ti'j. 10Porque tej tcyim Crist nok junx maj cyim tu'n tchjet kil; atzun ja'lo tuc'il Dios in ank'in. 11Ax icxtzun cyeye, che ximane ka ax toc minti'tl toclen il cyi'je, porque ic tza'n cyimni keye, pero itz' keye te Dios tu'nju cymojbabl cyibe tuc'il Jesucrist aju Kajaw. 12Cyja'tzun, mi'n txi cyk'o'ne ambil te il tu'n tcawin tuj cyximlale aju at tcyimel, ex mi'n txi cynimane aju tajbil cyximlale. 13Ex mi'n txi cyk'o'ne cyximlale te il tu'n tbinchet aju mya ba'n; o'cx cyk'onx cyibe te Dios mer ic tza'n cyimni keye nej pero itz' keye ja'lo, ex cyk'onx cyximlale te Dios tu'n tbinchet aju tz'aklxix. 14Porque ate il minti'tl toclen tu'n tcawin cyi'je, porque myatzun ate'ye tjak' ley, nok o'cx tcub t-xtalbil Dios cyibaje. 15¿Chi toc cyu'ne? ¿Ocpe ko binchal il tu'nju mya ato' tjak' ley, nok o'cx tcub t-xtalbil Dios kibaj? Mi'n. 16¿Minti'petzun ba'n cyu'ne? Ka ma txi cyk'on cyibe te juntl tu'n cyoque te tmajen tu'n t-xi cynimane, majen keye teju in xi cynimane; ka ma txi cynimane aju il, camic in tzaj tu'n; ex ka ma txi cynimane tyol Dios, che oquel k'o'ne te tz'aklxix tu'n. 17Pero chjonte te Dios, masque majentok keye te il ojtxi, atzun ja'lo ma txi cynimane tuj cyanmiye aju xnak'tzbil axix toc tzaj k'o'n cyeye. 18Ex tzokpi'majtl keye tjak' tipumal il, ma che oque te majen tu'n cybinchanteye aju tz'aklxix. 19(In chin yoline ic tza'n che yolin xjal tu'nju na'nx tel cynic'e ti'j.) Cyja'tzun, ic tza'n ojtxi xi cyk'o'ne cyximlale tu'n cyoque te tmajen mya ba'n, ex baj cytz'ilsan cyibe tu'n cybinchbene mya ba'n, ax icxtzun ja'lo cyk'onx cyximlale te Dios tu'n cybinchanteye aju tz'aklxix, tu'ntzun cyajbene o'cx te Dios. 20Porque tej ate'xtoke te tmajen il, myatzun majen keye tu'n cybinchanteye aju tz'aklxix. 21¿Atpe o cycambaye ti'j tcyakilju in che ch'ixwiye ti'j ja'lo? Minti', porque cyu'ntzun ke jlu in tzaj camic. 22Atzun ja'lo ma che tzokpete tjak' tipumal il ex ma che oque te tmajen Dios, ex atzun ma cycambaye jlu: Tu'n cyank'ine cypa'n cyibe ti'j il, ex tu'n tten cychwinklale te jumajx. 23Porque aju chojbil ke in tzaj tk'o'n il, atzun tu'n kcyim; atzunju oyaj in tzaj tk'o'n Dios ke, tu'n tten kchwinklal te jumajx tu'n kmojbabl kib tuc'il Jesucrist aju Kajaw.

will be added

X\