Romanos 16

1Bi'x cyile ch'in erman Febe, aju diaconis cyxol ocslal tuj tnam Cencrea. 2Cyc'mome tuj tbi Kajaw, ic tza'nx in bant cyxol ocslal, ex che onine tuc'il ti'j ju at tajben te; porque ate o tz'onin cye nimcu, ax icx o tz'onin weye. 3Cyk'onxe nk'olbeble te Priscila ex te Aquila, akeju wuc'ile tuj tak'un Jesucrist, 4ch'ixmi ẍe cub byo'n tu'n nclete cyu'n; tu'ntzunju in xi nk'o'ne chjonte cye, mya o'cx kine, ax icx cycyakil ocslal ate' tuj junjun tnam cyxol xjal mya judiy ke. 5Ax icx cyk'onxe nk'olbeble cye ocslal nno'c cychmon cyib tuj tja Priscila ex Aquila. Ex cyk'onxe nk'olbeble te Epéneto, aju at nc'u'je ti'j, tnejel ocslal ti'j Crist tuj lugar Acaya. 6Cyk'onxe nk'olbeble te Mariy, aju o tz'ak'nan nim cyxole. 7Cyk'onxe nk'olbeble te Andrónico ex te Junias, nxjalile ke jlu, ex junx e ten wuc'ile tuj pres, at cyoclen cyxol apostl, ex nej e ocslan ke ti'j Crist nwitze. 8Cyk'onxe nk'olbeble te Amplias aju at nc'u'je ti'j porque ocslal ti'j Kajaw. 9Cyk'onxe nk'olbeble te Urbano, aju kuc'il tuj tak'un Jesucrist, ax icx cyk'onxe nk'olbeble te Estaquis, aju at nc'u'je ti'j. 10Cyk'onxe nk'olbeble te Apeles, atzun jun ocslal ti'j Crist wa'lxix. Cyk'onxe nk'olbeble cye keju ate' tuj tja Aristóbulo. 11Cyk'onxe nk'olbeble te nxjalile Herodión. Cyk'onxe nk'olbeble cye keju ate' tuj tja Narciso, ocslal ke ti'j Kajaw. 12Cyk'onxe nk'olbeble cye erman xu'j Trifena ex Trifosa, akeju in che ak'nan tuj tak'un Kajaw. Cyk'onxe nk'olbeble te erman xu'j Pérsida, aju at nc'u'je ti'j, aju nim o tz'ak'nan tuj tak'un Kajaw. 13Cyk'onxe nk'olbeble te Rufo, cyxol cycyakil atzun jun mejor ocslal ti'j Kajaw, ex cyk'onxe nk'olbeble te ttxu', ic tza'n ax ntxu'ye. 14Cyk'onxe nk'olbeble te Asíncrito, te Flegonte, te Hermas, te Patrobas, te Hermes ex cye ke erman ate' cyuc'il. 15Ex cyk'onxe nk'olbeble te Filólogo, te Julia, te Nereo ex te tanb, te Olimpas ex cye cycyakil ocslal ate' cyuc'il. 16Cyk'olbem cyibe cyxolxe ex cytz'uban el cywitze tuc'il tcyakil cyc'ujlalile. In che'x k'olbe'ne cyu'n cycyakil ocslal tuj junjun tnam etzan ke tu'n Crist. 17In chin cubsane cywitze erman, tz'elx cynic'e cyi'j keju in che el pa'nte cye ocslal ex in cub cyk'o'n jun tolsabl tu'n cyjaw tolje ti'j; aju in cybincha'n mya ic tten ic tza'n ju xnak'tzbil ma cyc'ame; cypa'mil cyibe cyi'j ke jlu. 18Porque ke xjal lu minti' in che ajben te Kajaw Jesucrist, nok o'cx in cybincha'n aju in pon cyc'u'j ti'j, in cub cysbu'n keju nok ch'in cynabl, tu'nju cye che xmoxin ex mejor tbinx cyyol. 19Atzun cyeye, cycyakil xjal ma cybi cyi'je ma txi cynimane tyol Dios; cyja'tzun in chin tzalaje cyi'je; ex wajbile tu'n cyoque aj nabl tu'n cybinchanteye aju ba'n, pero mya tu'n cybinchanteye aju mya ba'n. 20Ex aju Dios k'olte kmojbabl kib, jurat naj cbel pach'u'n Satanás tjak' cykane tu'n. Aju t-xtalbil Kajaw Jesucrist tenwt cyuc'ile. 21In che'x k'olbe'ne tu'n Timotey aju wuc'ile tuj ak'untl, ex tu'n Lucio, ex tu'n Jasón, ex tu'n Sosípater; nxjalile ke jlu. 22Akine Tercio tz'ibalte ju u'j lu, in che'x nk'olbe'ne tuj tbi Kajaw. 23In che'x k'olbe'ne tu'n Gayo, aju k'ol nposadiye ex k'olte ja jatum nno'c c'ulbil cyu'n ocslal. In che'x k'olbe'ne tu'n Erasto, aju c'u'l pwak te tnam, ex tu'n kerman Cuarto. 24[Aju t-xtalbil Kajaw Jesucrist tenwt cyuc'ile cycyakile. Icxwitju.] 25Chjonte te Dios at tipumal tu'n cywe'xixe tu'n, ic tza'nx aju tkanil colbil in xi npacba'ne, aju in pacbanjtz ti'j Jesucrist. Atzunju yol lu ma tzaj tyec'un Dios, aju c'u'ntok tu'n tuj ewaj atxix tej na'nxtok tbant twitz tx'otx', 26atzun ja'lo ma tzaj tyec'un aju yol lu, aju cyaj cytz'iban ke t-sanjel Dios, ma tzaj yec'un ju yol lu ja'lo cye cycyakil xjal, tu'n t-xi cyniman ex tu'n t-xi cyocsla'n, ic tza'nx ju mandamyent o tma Dios, ate Dios at te jumajx. 27O'cx te Dios at tnabl. Nimanxwit ju tbi te jumajx nok tu'n Jesucrist. Icxwitju.

will be added

X\