Romanos 15

1Cyja'tzun, akeko' aju at kipun tuj kocslabl, tzic'xwit ku'n aju cypaltil keju minti' cyipun, ex mi'n kbincha aju kex kajbil tu'n ktzalaj ti'j. 2Teyle junjun ke kbincham aju ba'n, tu'n tajben te jun onbil te kuc'il ex tu'n ttzalaj ti'j, ex tu'n tch'iy tnabl. 3Porque ic tza'n te Crist minti' tbincha tex tajbil tu'n ttzalaj ti'j; nok o'cx ic'x tu'n ic tza'n in tma'n tuj Tu'jil: Aju yasbil cyu'n keju in che yasun ti'ja cub tz'ak wibaje. 4Porque tcyakil aju o tz'ibanjtz tuj Tu'jil ojtxi, o tz'ibanjtz te xnak'tzbil ke, tu'n tten kpasens ex tu'n tke' kc'u'j tu'nju yol tz'iban tuj Tu'jil, tu'ntzun tke'xix kc'u'j ti'j Dios. 5Aju Dios k'ol cypasense ex k'ukbal cyc'u'je, awt Dios tz'onin cyeye tu'n cytene junx cynable cyxolxe ic tza'nx tajbil Jesucrist, 6tu'ntzun tjaw cynimsa'ne tbi Dios, aju Tman Kajaw Jesucrist, junx cynable cycyakile ex junx cyyole. 7Cyja'tzun cyc'mom cyibe cyxolxe ic tza'n te Crist ma ko tc'am, tu'n tjaw nimset tbi Dios. 8Cyja'tzun cxel nma'ne cyeye, ate Jesucrist oc tk'on tib te ajbel cye aj Israel tu'n tyec'unjtz ka ax toc tyol Dios, tu'ntzun tjapun aju tyol Dios tziyimaj tu'n ojtxi cye kxe'chel, 9ex tu'n tjaw nimsa'n tbi Dios cyu'n xjal mya judiy ke, tu'nju ma tzaj k'ak'an tc'u'j Dios cyi'j, ic tza'n in tma'n tuj Tu'jil: Tu'ntzunju cjawil nnimsa'ne tbiya cyxol txkantl xjal cyuj mastl nasyon, ex chin bitzale tu'n tjaw nimset tbiya. 10Ex juntl maj in tma'n: Akeye txkantl xjal cyuj mastl nasyon, che tzalajxe tuc'il ju tnam etzan tu'n Dios. 11Ex juntl maj in tma'n: Cynimsa'nctze tbi Kman, akeye txkantl xjal cycyakile cyuj mastl nasyon, ex cycyakile akeye tnam cynimsa'nctze tbi. 12Ex at jun yol in tma'n Isaías cyja': Ctzajel jun tiyjil Isaí. Tzul te cawil cyibaj txkantl xjal cyuj mastl nasyon; ex ckebel cyc'u'j txkantl xjal ti'j, chi tuj Tu'jil. 13Ate Dios in tzaj k'ukbante kc'u'j, awt nojsante cyanmiye tu'n tcyakil tzalajbil, ex awt k'onte cymojbabl cyibe nok tu'n cyocslable, tu'ntzun tke'xix cyc'u'je ti'j tu'n tipumal Xewbaj Xjan. 14K'ukl nc'u'je cyi'je, erman, tu'nju ba'n cymodiye, ex at nim cyojtzkible, ex ba'n che k'on cynable cyxolxe. 15Pero clarxix ma txi ntz'ibane cyeye erman ti'j junjun yol, tu'n mi'n tic' tna'l cyu'ne. Ma txi nma'ne tu'nju at woclene tzaj tk'o'n Dios, 16tu'n woque ajbel te Jesucrist cyxol xjal mya judiy. Aju wajbeble, tu'n t-xi npacba'ne tkanil colbil aju ma tzaj tk'o'n Dios, tu'ntzun cyc'met txkantl xjal tu'n Dios ic tza'n jun oyaj ba'n nne'la tuj twitz, pa'maj ke tu'n Xewbaj Xjan tu'n cyajben o'cx te Dios. 17Tu'nju ocslal kine ti'j Jesucrist, cyja'tzun in chin tzalaje ti'j wajbeble te Dios. 18Porque mlay chin yoline ti'j juntl ti'xti, o'cx ti'j ju ma tbincha Crist, tu'n nyole ex tu'n wak'unbene tu'n t-xi cyniman xjal mya judiy tyol Dios. 19Ma bant jlu wu'ne nok tu'n cyipumal ke señ ex tu'n cyipumal ke binchben ma'xix cyxilen, ex tu'n tipumal T-xew Dios; cyja'tzun, ma pon baj npacba'ne tkanil colbil tu'n Crist, tzajnix tuj tnam Jerusalén ex max ma pon baj tuj tx'otx' Ilírico. 20Ex cyja'tzun nno'c tilil wu'ne tu'n t-xi nma'ne tkanil colbil jatum na'nxtok cybinte xjal tkanil ti'j Crist, tu'ntzun mi'n wak'nane jatum otok xe't tu'n juntl xjal, 21ic tza'n in tma'n tuj Tu'jil: Akeju bajx cybi tkanil ti'j, oc cyila', ex akeju na'nxtok cybinte tkanil ti'j, c'elel cynic' ti'j, chi tuj Tu'jil. 22Cyja'tzun, nimcu maj o chin we'ye tu'n mi'n nxi'ye cyuc'ile. 23Pero ja'lo, minti'tl jatum tu'n wak'nane cyuj lugar tzalu, ex ma bet-xi abk'i in wajbe'ne tu'n nxi'ye cyuc'ile. 24Cyja'tzun, oc nxi'ye tuj España, chin ic'ele cyuc'ile; porque ximan wu'ne oc wila'ye cywitze oc wic'e, ex tu'n ttzaj cyk'o'ne ch'in onbil weye tu'n tajben tuj nbeye, otokxi chin tzalaj ch'ine cyuc'ile nej. 25Atzun ja'lo ma chinxe tuj tnam Jerusalén tu'n t-xi wi'ne jun onbil cye ocslal. 26Porque ba'n e'la tuj cywitz aj Macedonia ex ke aj Acaya tu'n tjaw chmet jun oyaj tu'n t-xi k'ot cye meba ate' cyxol ocslal tuj Jerusalén. 27Porque ba'n e'la tuj cywitz aj Macedonia tu'n t-xi cyk'o'n jun oyaj cye ocslal tuj Jerusalén, oc cyk'o'n mer ic tza'n at cyc'as cyuc'il; porque ic tza'n ma cyc'am xjal mya judiy ju tcy'iwbil Dios nok cyu'n ocslal judiy, ax icxtzun il ti'j tu'n cyonin xjal mya judiy ti'j ju at tajben cye ocslal judiy. 28Cyja'tzun, oc tjapun jlu wu'ne, t-xilenxi nk'o'ne aju oyaj lu cye, chin ic'ele visitaril cyeye oc nxi'ye tuj España. 29Ex ba'n wu'ne, oc nxi'ye cyuc'ile, oc cyc'ma'ye nimxix t-xtalbil Crist oc npone cyuc'ile. 30Chin cubsaltzune cywitze erman, nok tu'nju ocslal ko' ti'j Kajaw Jesucrist, ex tu'nju at cyc'ujlalile tu'n Xewbaj Xjan, che onine wi'je tuj cyna'j Diose, ex che cubsane twitz Dios wi'je, 31tu'n ncolpaje cywitz ke xjal miban che bin ate' tuj Judey, ex aju oyaj cxel wi'ne cye ocslal tuj Jerusalén ba'nwt tz'e'la tuj cywitz; 32ex tu'n npone cyuc'ile tuc'il tzalajbil nok tu'n tajbil Dios, ex tu'n wojlan ch'ine cyuc'ile. 33Awt Dios ten cyuc'ile cycyakile, aju k'olte kmojbabl kib. Icxwitju.

will be added

X\