Romanos 14

1Ka at jun erman mya cyuw tten tuj tocslabl, cyc'mome, pero mi'n baj cykanine tza'n tten t-ximbetz. 2Porque at junjun erman ba'n tuj cywitz tu'n t-xi cychyo'n tcyakil; atzun junjuntl mya cyuw cyten tuj cyocslabl, minti' in xi cychyo'n chibj, o'cx mastl nic'bebl in xi cyu'n. 3Ka at jun erman in xi tchyo'n tcyakil, mi'n tz'el tic'un aju minti' in xi tchyo'n tcyakil; ex ka at jun minti' in xi tchyo'n tcyakil, mi'n yolin ti'j ju in xi tchyo'n tcyakil; porque o c'met xjal lu tu'n Dios. 4¿Yajtzun teya, ti toclena tu'nju in yolina mya ba'n ti'j tmajen juntl? Porque tuj tcwent tpatrón ta' ka wa'l ex ka cubni tz'ak; pero cbel wabanxix, porque at tipumal Kajaw tu'n twe'xix. 5At junjun erman in ximan ti'j ka at jun k'ij mas ba'n twitz juntl; atzun juntl in ximan ti'j ka junx cyxilen tcyakil k'ij. Teyle junjun tu'n t-ximan ti'j alcye ba'n tuj twitz. 6Alcye jun xjal niman jun k'ij tu'n, niman tu'n porque taj tu'n tniman te Kajaw, ex alcye jun xjal mya niman jun k'ij tu'n, mya niman tu'n porque ax icx taj tu'n tniman te Kajaw. Alcye jun xjal in xi tchyo'n tcyakil, in xi tchyo'n porque taj tu'n tniman te Kajaw, ex in xi tk'o'n chjonte te Dios; ex alcye jun xjal minti' in xi tchyo'n tcyakil, minti' in xi tchyo'n porque ax icx taj tu'n tniman te Kajaw, ex in xi tk'o'n chjonte te Dios. 7Porque mi a'l jun ke in ank'in tu'n tajben teju tex tajbil, ex mi a'l jun in cyim tu'n tex tajbil. 8Porque ka in ko ank'in, in ko ank'in tu'n kajben te Kajaw; ex ka ma ko cyim, tu'n tajbil Kajaw ko cymel. Cyja'tzun, ka in ko ank'in ex ka ma ko cyim, te Kajaw ko'. 9Tu'ntzunju cyim Crist ex jaw ank'in, tu'n toc te Cyajaw cyimni ax icx cye itz'. 10¿Yajtzun teya, tiku'n in yolina ka mya ba'n termaniya? ex ¿tiku'n nne'l tic'una termaniya? Porque kcyakil ko pol twitz Crist tu'n koc tuj xjel. 11Porque in tma'n tuj Tu'jil: Akine Dios in xi nma'ne jun nyole axix toc, che bel ẍmeje' cycyakil xjal nwitze, ex cycyakil xjal oc cyma' ka akine Dios, chi tuj Tu'jil. 12Cyja'tzun, teyle junjun ke oc tk'a' tajlal twitz Dios ti'j tbinchben. 13Cyja'tzun, mi'n ko yolin mya ba'n ti'j juntl kxolx, nok o'cx ko ximan ti'j tu'n mi'n tcub kk'o'n jun tolsabl twitz jun kerman ex tu'n mi'n tcub tz'ak tuj il ku'n. 14Tu'nju ocslal kine ti'j Kajaw Jesús, cyja'tzun ba'n wu'ne ex ma tz'el nnic'e ti'j, minti' jun chibj mibanwt tchyo'njtz, pero ka at jun erman in ximan ti'j ka mya ba'n tu'n t-xi tchyo'n nok alcyex, entons mi'n txi tchyo'n, porque mya ba'n tuj twitz. 15Katzun ma bisun termaniya tu'n tlaj ju in xi tchyo'na, entons minti'tl tc'ujlalila ti'j termaniya icju. Mi'nwt tz'el tzpet termaniya tu'n tlaj ju in xi tchyo'na, porque o cyim Crist tu'n tclet. 16Mi'n cyak'e ambil tu'n tyolinjtz mya ba'n ti'j ju ba'n nne'la tuj cywitze. 17Porque aju tcawbil Dios myatzun a tnabl ti'j kchi' ex ka ti'j kc'a, nok o'cx tu'n kten tz'aklxix ex tuj kmojbabl kib kxol ex tuj tzalajbil tu'n Xewbaj Xjan. 18Porque alcye in ajben te Crist ic tza'n jlu, in tzalaj Dios ti'j, ex nnic' cywitz xjal ti'j ka ba'n. 19Cyja'tzun, ko lpe'c ti'j ju in tzaj k'inte kmojbabl kib kxolx ex aju in ajben te ch'isbil knabl kxolx. 20Mi'n cub t-xituna tak'unben Dios tu'n tlaj ju in xi tchyo'na. Ax toc tcyakil chibj sak ta'; pero mya ba'n tu'n tcub tz'ak juntl erman tuj il tu'n tlaj ju in xi tchyo'na. 21Ba'n tu'n mi'n t-xi tchyo'na chibj ex tu'n mi'n t-xi tc'a'na vin ex mi jun tu'n tbinchanteya aju jacu jaw tolj termaniya tu'n, tu'ntzun mi'n tcub tz'ak tuj il, ex tu'n mi'n tcub numj tuj tocslabl. 22Ka at tocslabla, tenx tocslabla twitz Dios. At tzalajbil teju xjal minti' in tma'n tanmi ka at til ti'j jun ti'xti aju otok tzic' twitz ti'j ka ba'n. 23Atzunju xjal in jolpaje' tc'u'j ti'j ju in xi tchyo'n, atzun ilju, porque ma txi tchyo'n ex mya k'ukl tc'u'j ti'j ka ba'n; ex tcyakilju in kbincha'n ka mya k'ukl kc'u'j ti'j ka ba'n, atzunte ilju.

will be added

X\