Romanos 12

1Erman, ma tzaj k'ak'an tc'u'j Dios k'ij, cyja'tzun chin cubsale cywitze tu'n t-xi cyk'o'ne cyximlale te Dios ic tza'n jun oyaj itz', tecuxix Dios ex ba'n nne'la tuj twitz, atzun cyc'ulbile axix toc twitz Dios. 2Ex mi'n che oc lpe'ye ti'j cynabl xjal mya ba'n, nok o'cx cych'expum cynable tu'n cyoque te ac'aj, tu'ntzun cyojtzkinteye alcye tajbil Dios, tu'n tel cynic'e ti'j alcye ba'n, ex alcye in tzalaj Dios ti'j ex alcye ju tz'aklxix. 3Nok tu'n t-xtalbil Dios ma tzaj k'o'n woclene, cyja'tzun cxel nma'ne cyeye cycyakile, mi jun tu'n t-ximan ti'jx ka at mas toclen ex balo minti', nok o'cx tu'n t-ximan ti'jx tujxix tumel, ic tza'nx tocslabl junjun tzaj tmalo'n Dios. 4Porque ic tza'n kximlal nimcu ikan tu'n ex mya junx ta' cyak'un, 5icxtzun kten, masque nimcu kbaj pero nok jun kximlal tu'nju kmojbabl kib tuc'il Crist, ex kcyakil ktzuylaj kib ti'j jun kximlal. 6Cyja'tzun, junxilchak toclen junjun ke ma tzaj tk'o'n Dios ic tza'nx tajbil, ba'n tu'n kajben tuj tumelxix. Alcye at toclen tu'n t-xi tpacba'n tyol Dios, ba'n tu'n t-xi tpacba'n ic tza'nx tocslabl tzaj tmalo'n Dios. 7Alcye at toclen tu'n tajben cye mastl, ba'n tu'n tajben. Alcye at toclen tu'n tk'onte xnak'tzbil, ba'n tu'n t-xi tk'o'n xnak'tzbil. 8Alcye at toclen tu'n t-xi tk'o'n cynabl mastl, ba'n tu'n t-xi tk'o'n cynabl. Alcye ba'n k'on cotzbaj, k'onx tu'n tcyakil tc'u'j. Alcye ba'n toc te nejenel, ba'n tu'n toc tk'o'n cwent ti'j; ex alcye in k'ak'an tc'u'j ti'j juntl, oninx tu'n tcyakil tzalajbil. 9Aju cyc'ujlalile myawt nok tten. Cyic'un ele aju mya ba'n, che lpe'que ti'j ju ba'n. 10Cyc'ujlam cyibe cyxolxe porque cyitz'in cyibe; tz'oc tililx cyu'ne tu'n cynimanjtz ke mastl ocslal ex mya o'cx akeye tu'n cynimanjtze. 11Tz'oc tililx cyu'ne ex mi'n che oque cy'aj; tenwt t-sec'al cyanmiye ex che ajbene te Kajaw. 12Che tzalajxe tu'nju k'ukl cyc'u'je tu'n cytene tuc'il Kajaw; tzic'xwit yajbil cyu'ne; ex mi'n che k'ajene tu'n cyna'ne Dios. 13Che onine cyi'j ocslal ti'j ju atx taj cye; ex cyk'onxe cyposad ocslal. 14Che cubsane twitz Dios tu'n cycub cy'iwla'n keju in che yajlan cyeye; cykaninxe cy'iwbil cyibaj, ex mi'n txi cykanine mya ba'n cyibaj. 15Che tzalajxe cyuc'il keju in che tzalaj; che ok'e cyuc'il keju in che ok'. 16Junxwit cynable cyxolxe; mi'n jaw cyniman cyibe; cymojban oc cyibe cyuc'il keju nok ch'in cyoclen. Mi'n che ximane ti'j ka mas at cynable. 17Ka ma binchanjtz mya ba'n cyi'je, mi'n tz'aj cyk'o'ne t-xel mya ba'n; tz'oc tililx cyu'ne tu'n tbant aju ba'n tuj cywitz cycyakil xjal. 18Ka jacu bant cyu'ne, tz'oc tililx cyu'ne tu'n cytene ba'n cyuc'il cycyakil xjal. 19Akeye erman at nc'u'je cyi'je, mi'n tz'aj cyk'o'ne t-xel mya ba'n, nok o'cx cyk'oncje tuj tcwent Dios; porque in tma'n tuj Tu'jil: Wu'ne c'ajel t-xel; akine chin k'olte castiw, chi Kman. 20Cyja'tzun, aju aj k'oj ti'ja, ka at we'yaj ti'j, k'onxa twa; ex ka at txketle'n ti'j, k'onxa tc'a; ka ma tbinchaya icju ctzajel tch'ixwi, chi tuj Tu'jil. 21Mi'nwt cub ti'ja tu'nju mya ba'n, nok o'cx tu'n tcub ti'j mya ba'n tu'na tu'nju tbinchbena ba'n.

will be added

X\