Romanos 10

1Erman, ax toc tajbil wanmiye ex in chin cubsane twitz Dios cyi'j aj Israel, tu'n cyclet. 2Porque ma wile tza'n cyten, nim cygan tu'n cyajben te Dios, pero minti' nne'l cynic' ti'j alcye tumel tu'n cyajben te Dios, 3porque minti' nne'l cynic' ti'j tza'n tten tu'n cyoc te tz'aklxix tu'n Dios, nok o'cx nno'c tilil cyu'n tu'n cyoc te tz'aklxix cyu'nx cybinchben, ex minti' in xi cyk'on cyib te Dios tu'n cyoc k'o'n te tz'aklxix. 4Porque aju tley Moisés o'cx japun baj ti'j Crist, tu'ntzun cyoc k'o'n te tz'aklxix tu'n Dios cycyakil keju ma che ocslan ti'j Crist. 5Porque cyaj ttz'iban Moisés tza'n tten tu'n toc jun xjal te tz'aklxix tu'nju ley, chi in tma'n cyja': Ka ma japun tu'n xjal tcyakilju in tma'n tuj ley, oc c'ank'il tu'n, chi tuj ley. 6Atzun ti'j ju tu'n koc tk'o'n Dios te tz'aklxix nok tu'n kocslabl in tma'n cyja': Mi'n tmaya tuj tanmiya: ¿Alcye cjawix tuj cya'j? (atzunte jlu taj tu'n tcu'tz Crist tu'n tzalu twitz tx'otx'); 7ex mi'n tmaya: ¿Alcye cbelex tuj cynajbil cyimni? (atzunte jlu taj tu'n tjatz k'i'n Crist tu'n cyxol cyimni). 8Pero ¿ti t-xilen ju yol lu? Nikayin ta' ju yol ttxlaja, tuj ttzi'ya ta' ex tuj tanmiya, chi tuj Tu'jil. Atzunju yol lu in xi kpacba'ne in yolin ti'j ocslabl: 9Ka in tchic'ba'na tu'n ttzi'ya ka a Jesús Kajaw, ex ka ma tocslaya tuj tanmiya ka tu'n Dios jatz ank'in Jesús cyxol cyimni, oc cletela. 10Porque tuj kanmi in xi kocsla'n tu'n koc te tz'aklxix tu'n Dios, ex tu'n ktzi' in kchic'ba'n ka a Jesús Kajaw tu'n kclet. 11Porque in tma'n tuj Tu'jil: Cycyakil keju ma che ocslan ti'j, mlay che ch'ixwi, chi tuj Tu'jil. 12Tuj twitz Dios mya part cyxilen xjal judiy cyuc'il ke xjal mya judiy, porque axte Kajaw, Cyajaw cycyakil, ex in tzaj tk'o'n nimcu cye cycyakil keju in che cubsan twitz. 13Porque in tma'n tuj Tu'jil, cycyakil keju in che cubsan twitz Kman, oc che cletel. 14Pero ¿tza'ntzun tten tu'n cycubsan twitz Kajaw ka na'nx cyocslan ti'j? ¿Ex tza'ntzun tten tu'n cyocslan ti'j ka na'nx cybinte ti'j? ¿Ex tza'n tten tu'n cybinte ka mi a'l jun k'ol tkanil cye? 15¿Ex tza'n tten tu'n cyk'onte tkanil ti'j ka mi ẍe'x sama'n? Ic tza'n in tma'n tuj Tu'jil: Tbanilxix cyque'yinx keju [in che pacban tu'n cyten xjal tuj txubtxaj, ex] in che pacban tkanil ba'n. 16Pero mya cycyakil in xi cybi'n aju tkanil colbil; porque in tma'n Isaías: Tat, ¿Mape txi cyocsla'n xjal kpacbable? Chi Isaías. 17Cyja'tzun in ko ocslan tu'nju yol in kbi'n, ex aju yol in kbi'n tyol Crist. 18Pero in xi nma'ne: ¿Maj minti' o cybi aju yol lu? O cybi. Porque in tma'n tuj Tu'jil: Tuj tcyakil twitz tx'otx' ma tz'ex tkanil cyyol, ex ma pon baj cyyol ttxa'npun tx'otx', chi tuj Tu'jil. 19Ex in xi nma'ne juntl maj: ¿Maj minti' ba'n jlu cyu'n aj Israel? Ba'n cyu'n. Porque tnejelxix in tma'n Moisés cyi'j aju tzaj tma'n Dios te: Ctzajel tlo'ch cyc'u'je wu'ne tu'n tlaj juntl tnam aju in cyma'ne ti'j ka minti' tajben; ex che jawil k'ojle wu'ne tu'n tlaj jun tnam minti' tnabl, chi Dios. 20Ax icx te Isaías o yolin cyuwxix ex tma cyja': Ma chin cnete cyu'n keju minti' in che jyon wi'je. Ma txi nyec'un wibe cye keju minti' in che kanin wi'je, chi Dios. 21Atzun cyi'j aj Israel in tma'n Isaías cyja': Enter jun k'ij ma txi nnukpi'n nk'abe txcol te jun tnam miban bin ex mojtzal yol, chi Isaías.

will be added

X\