Apocalipsis 9

1Ex oc tk'ajtza'n tjwe'yin anjel ju chun, ex o wile tzaj tz'ak jun che'w twitz cya'j cubil twitz tx'otx'; ex xi k'o'n tal ja te tu'n tjaket ttzi jul jalo ponin t-xe'. 2Ex jakettzun ttzi jul tu'n, aju jalo ponin t-xe', ex jatz sib tuj jul ic tza'n in jatz sib tuj jorni ma'xix; ex bi'x oc yupj twitz k'ij tuc'ix twitz cya'j tu'nju sib jatz tuj jul. 3Ex e jatz ẍplon tuj sib e cub ten twitz tx'otx'; ex xi k'o'n cyipumal ẍplon ic tza'n cyipumal ke si'nin ate' twitz tx'otx'. 4Ex xi k'ma'n cye tu'n mi'n cyc'ixbisan ti'j ch'im at twitz tx'otx', ex tu'n mi'n cyc'ixbisan ti'j cha'x c'ul ex mi ti'j tze', nok o'cx tu'n cyc'ixbisan cyi'j xjal, akeju minti' t-sey Dios toc tibaj cywitz. 5Minti' xi k'o'n cyoclen tu'n cycyim xjal cyu'n, nok o'cx tu'n cyyajlanjtz xjal cyu'n tuj jwe' xjaw; ex aju ta'w cyc'ixbisabl ic tza'n nno'c tx'a'n jun xjal tu'n si'nin. 6Tuj tk'ijlalil lu, che jyol xjal tumel tu'n cycyim, pero mlay che cyim; masque cyajbil tu'n cycyim, pero mlay che cyim. 7Ic che que'yin ẍplon ic tza'n ke chej banin cyten tu'n cyxi' tuj k'oj; ex tjax jun ti'xti tuj cywi' ic que'yin ic tza'n coron k'an pwak ttx'otx'il; atzun cywitz ẍplon ic que'yin ic tza'n cywitz xjal. 8Atzun ttzmal cywi' ic que'yin ic tza'n ttzmal cywi' xu'j; ex ke twitz cye' ic che que'yin ic tza'n twitz cye' balun. 9Ex toc cychicyet ẍplon ic que'yin ic tza'n chicyet c'uxbil; ex in xumin cyxic' ic tza'n in che xumin nimcu carwaj jawo'n cyu'n chej in che kelan tuj k'oj; 10ic que'yin cyje' ẍplon ic tza'n cyje' si'nin ex at cytx'abl; ex at tipumal cyje' tu'n cyc'ixbisanjtz xjal cyu'n tuj jwe' xjaw. 11Ex at jun cyrey ẍplon cawil cyibaj, atzun anjelju najl tuj jul jalo ponin t-xe'; aju tbi anjel tuj yol ebrey Abadón, atzun tuj yol grieg Apolión tbi. 12Aju tnejel c'ixbisabl ma tzic'; pero atx cabetl c'ixbisabl che ul te tibajxi jlu. 13Ex oc k'ajtza'n chun tu'n tkakin anjel, ex o nbiye at jun tzaj k'ajt cyxol keju cyaje cach ate'c ti'j altar k'an pwak ttx'otx'il, aju tcub twitz Dios. 14Tzaj tma'n teju tkakin anjel aju k'i'n chun tu'n: —Tzokpi'mela keju cyaje anjel, akeju c'alo'n ttzi nima Éufrates, chi. 15E je'ltzun tzokpi'n ke cyaje anjel, akeju banimaj cyten alcye or, alcye k'ij, alcye xjaw ex alcye abk'i tu'n cycyim keju toxin c'loj xjal cyu'n. 16Aju cyajlal soldad cyjax cyibaj chej, cab syent miyón cybet; o nbiye cyajlal. 17Cyja'tzun o wile ic tza'n tuj witzic' ke chej cyuc'ix keju cyjax cyibaj, toc cychicyet cyak que'yin ic tza'n k'ak', ex cha'x que'yin ic tza'n tal abj zafiro, ex ẍk'an que'yin ic tza'n azufre. Ex aju cywi' chej ic que'yin ic tza'n cywi' balun; ex nne'tz k'ak' tuj cytzi' chej tuc'ix sib ex azufre. 18Tu'nju ox c'ixbisabl lu e baj cyim toxin c'loj xjal: tu'n k'ak' ex tu'n sib ex tu'n azufre etz tuj cytzi' chej. 19Porque at cyipumal chej tu'n cyc'ixbisan tu'n cytzi' ex tu'n cyje'; porque aju cyje' ic que'yin ic tza'n lobaj, at cywi' ti'j cyje', ex ba'n tx'a'n cyje'. 20Atzun ke mastl xjal, akeju minti' e cyim tu'nju ox c'ixbisabl lu, minti' ajtz ti'j cyanmi, ex minti' el cypa'n cyib cyi'j tbinchben cyk'ab, ex minti' cyaj cycolin tu'n cyc'ulun cywitz ke ju'ẍ ex cywitz ke tilbilal k'an pwak, ex sak pwak, ex k'an c'uxbil, ex abj ex tze' cytx'otx'il, akeju miban che que'yin, ex miban che bin, ex miban che bet. 21Ex minti' ajtz ti'j cyanmi xjal, minti' cyaj cycolin tu'n tcub cybyo'n xjal, tu'n cycy'a'n, tu'n cyyaẍin, ex tu'n cyelk'an.

will be added

X\