Apocalipsis 8

1Tejtzun tel ti'n Tal Ẍne'l aju twukin sey, mi jun o k'ajt tuj cya'j, balo te mey or. 2Ex e wile keju wuk anjel wa'l ke twitz Dios; ex xi k'o'n wuk chun cye. 3Ultzun juntl anjel ex cub we' twitz altar, k'i'n jun ẍla'c tu'n, k'an pwak ttx'otx'il; ex xi k'o'n nim storac te tu'n toc te tmoj cyna'j Dios cycyakil ocslal, ex tu'n tcub tk'o'n tibaj ju altar k'an pwak ttx'otx'il aju tcub twitz tk'ukbil Dios. 4Jaw t-sibel storac tuj tk'ab anjel, japun twitz Dios tuc'ix cyna'j Dios ocslal. 5Jawtzun ti'n anjel ju ẍla'c ex cu'x tnojsa'n tu'n k'ak' tcub tibaj altar, cu'tz t-xo'n twitz tx'otx'. Ex tzajtzun k'ancyok in julin tuc'ix tkan k'ancyok ex tuc'ix cyaknajnab. 6Atzun ke wuk anjel, akeju k'i'n wuk chun cyu'n, bant cyten tu'n toc cyk'ajtza'n chun. 7Tej toc tk'ajtza'n tnejel anjel ju chun, tzaj sakbakun tuc'ix k'ak' cysmon cyib tuc'il chic', e tzaj xo'n twitz tx'otx'; ex baj tz'e'y toxin piẍ twitz tx'otx', ex baj tz'e'y toxin tnej tze', ex baj tz'e'y tcyakil cha'x c'ul. 8Ex tej toc tk'ajtza'n tcabin anjel ju chun, o wile ic tza'n jun witz ma'xix in c'ant tu'n k'ak' tzaj xo'n tuj mar. Ex aju toxin piẍ mar oc te chic'. 9Ex e cyim keju toxin tnej jil ate' tuj mar. Ex toxin c'loj barc e baj naj. 10Ex tej toc tk'ajtza'n toxin anjel ju chun, tzaj tz'ak jun che'w ma'xix twitz cya'j, in c'ant ic tza'n ttxan tzaj, ex tzaj tz'ak cyibaj toxin c'loj nima in che bet ex cyibaj jatum in che jatz twi a'. 11Atzun tbi che'w, C'a C'ul; ex aju toxin c'loj a' oc puro c'a, ex nimcu xjal e cyim tu'n cylaj a' otok che oc puro c'a. 12Ex tej toc tk'ajtza'n tcyajin anjel ju chun, oc c'ixbisa'n aju toxin piẍ k'ij, tuc'ix toxin piẍ xjaw, tuc'ix toxin tnej che'w, cyja'tzun cub kloljxix toxin tnej cywitz, tu'n mi'n tten spic'un cyaje or te k'ijl ax icx te konic'an. 13Ex o wile jun anjel in lipan tmijil cya'j, ex o nbiye tk'ajk'ajel twi' cyuwxix in tma'n: —Bec'bil cywitz, bec'bil cywitz, bec'bil cywitz keju najl ke twitz tx'otx' tu'n cylaj ke chun ch'ixtok cyoc k'ajtza'n cyu'n oxetl anjel.

will be added

X\