Apocalipsis 4

1Tbajlenxitzun k'ma'n jlu, o wile jun ttzi ja catl tuj cya'j. Ex tzaj k'ajt aju otok yolin wuc'ile nej, aju o nbiye tk'ajk'ajel twi' ic tza'n twi' chun, ex tma weye: —Tjatza tzalu ex cxel nyec'une teya tcyakilju tzul te tibajxi jlu, chi Jesús weye. 2Ex jurat naj cub ten tipumal Xewbaj Xjan wibaje, ex o wile jun k'ukbil tuj cya'j jatum in cawin Dios, ex ax Dios k'ukl tuj k'ukbil. 3Ex aju k'ukltok tuj k'ukbil lu ic que'yin ic tza'n jun tal abj jaspe ex ic tza'n jun tal abj cornalina; ex at jun t-xmacal lobaj ti'jele ju k'ukbil ic que'yin ic tza'n tal abj esmeralda. 4Ex ti'jele ju tk'ukbil Dios at 24 k'ukbil, ex o wile at 24 tij xjal k'ukl ke cyuj k'ukbil, toc cyxbalun sak ex tjax coron k'an pwak tuj cywi'. 5Ex ti'j tk'ukbil Dios in che etztok tkan k'ancyok tuc'ix k'ancyok in jululun; ex in che c'ant wuk candil twitz ju tk'ukbil; atzun ke jlu akeju wuk T-xew Dios. 6Ex twitz ju k'ukbil at jun tcub ic que'yin ic tza'n mar, puro ẍtilun, ic que'yin ic tza'n jun vidr sak. Ex ti'jele ju k'ukbil ate' cyaje querubín nimcu tbak' cywitz at, ax icx ttzal cyi'j at tbak' cywitz. 7Aju tnejel querubín ic que'yin ic tza'n jun balun; atzunju tcabin ic que'yin ic tza'n jun wacẍ, atzunju toxin ic que'yin twitz ic tza'n twitz jun xjal; ex atzunju tcyajin ic que'yin ic tza'n jun t'iw in lipan. 8Akeju cyaje querubín lu teyle junjun at kak t-xic', ex nim tbak' cywitz at cyi'jele ex tjak' cyxic'; ex minti' in che k'ajen k'ijl ex konic'an in che bitzan, in cyma'n: Xjante, xjante, xjante, Kman Dios aju at tipumal tu'n tbant tcyakil tu'n, aju at ojtxi, ex at ja'lo, ex tzul. 9Ex tcyakil maj oc in jaw cynimsa'n ke querubín lu tbi Dios aju k'ukl tuj tk'ukbil, ex in cyk'o'n nimbil te ex in cyk'o'n chjonte te porque itz' tuj tcyakil tabk'iyil te jumajx; 10ax icx ke 24 tij xjal in che cub ẍmeje' twitz Dios aju k'ukl tuj tk'ukbil, ex in che c'ulun twitz porque itz' tuj tcyakil tabk'iyil te jumajx, ex in cub cyk'o'n cycoron twitz tk'ukbil, in cyma'n: 11Aya Kman Dios, ba'n tu'n tjaw nimset tbiya, ex tu'n tnimanjtza, ex tu'n tc'monteya ipumalj; porque aya binchante tcyakil, ex nok tu'nju tajbila ate', ex e binchanjtz.

will be added

X\