Apocalipsis 3

1Ex tz'ibanxa teju anjel at cyxol ocslal tuj tnam Sardis: Atzun jlu in tma'n aju at cywukil T-xew Dios tuc'il ex cyuc'ix ke wuk che'w: Ojtzki'n ke cybinchbene wu'ne, ex ba'n wu'ne in k'manjtz cyi'je ka itz' keye, pero cyimni keye. 2Cyna'ntztzun cyibe, ex cycyuwsame aju atx cyuc'ile aju ch'ix tnaj; porque ma wile ke cybinchbene mya tz'aklxix twitz Dios. 3Cyja'tzun, cyna'ntze aju xnak'tzbil ma cyc'ame ex ma cybiye; cyc'u'nxe ex tajtz ti'j cyanmiye. Ka minti' ma che xk'ukine, chin ule ic tza'n elek', ex mlayx cybiye alcye or tu'n wule cyuc'ile. 4Pero at junjun cyxole tuj tnam Sardis minti' ma tz'ilix ti'j cyxbalun; atzun keju che betel wuc'ile toc cyxbalun sak, tuj tumelxix jlu porque ba'n ke. 5Alcye ma cub ti'j mya ba'n tu'n, atzunju c'oquel t-xbalun sak; ex mlay jatz nk'uchine tbi tuj libro te chwinklal, ex cxel nchic'ba'ne twitz Nmane ex cywitz ke t-anjel ka ax toc ocslal wi'je. 6Alcye at t-ẍcyin, binx aju in tma'n Xewbaj Xjan cye cycyakil ocslal tuj junjun tnam. 7Ex tz'ibanxa teju anjel at cyxol ocslal tuj tnam Filadelfia: Atzun jlu in tma'n aju xjan, ex aju ax toc tyol, ex k'i'n tal ja te rey David tu'n, in jaket tlamel ja tu'n ex mi jun xjal jacu bant tu'n tlamet tu'n, ex in lamet tlamel ja tu'n ex mi jun xjal jacu bant tu'n tjaket tu'n. 8Ojtzki'n ke cybinchbene wu'ne. Lu ma jaket wu'ne jun ttzi ja cywitze, ex mi jun xjal jacu bant tu'n tlamet tu'n; ba'n wu'ne nok ch'in cyipumale at, pero ma japun nyole cyu'ne ex minti' ma cub cyewane cywitz xjal ka ojtzki'n kine cyu'ne. 9Ex keju cyk'on cyib te Satanás, keju in cyma'n ka judiy xjal ke ex mya judiy xjal ke, nok o'cx in che nic'an yol, che tzajel wi'ne tu'n cycub ẍmeje' cywitze, ex tu'n tel cynic' ti'j, akine ẍin c'ujlan cyeye. 10Tu'nju ma japun nyole cyu'ne ex ma tzic'x yajbil cyu'ne, cyja'tzun che cletele wu'ne oc tul canun tk'ijlalil oc cyoc cycyakil xjal tuj joybil cyi'j, akeju najl ke twitz tx'otx'. 11Jurat chin ul naje; aju at cyuc'ile cytzyumxixe wen, tu'ntzun mi'n tel k'i'n ju oyaj cyeye tu'n juntl. 12Alcye ma cub ti'j mya ba'n tu'n, c'oquel nk'o'ne te tkan ja tuj tja Dios, mlayx tz'etz, axtzun cyjel ten; ex c'oquel ntz'ibane tbi Dios ti'j ex tbi jun tnam aju etzan tu'n Dios, aju ac'aj Jerusalén tbi, aju cbeletz tuj cya'j jatum ta' Dios, ax icx c'oquel ntz'ibane ti'j aju nbiye ac'aj. 13Alcye at t-ẍcyin, binx aju in tma'n Xewbaj Xjan cye cycyakil ocslal tuj junjun tnam. 14Ex tz'ibanxa teju anjel at cyxol ocslal tuj tnam Laodicea: Tcyakilju o bant tu'n Dios t-xe tnejel, ti'j Jesucrist tzaj xe't; ate Jesucrist junx ti'j tyol, ex atzun jun testiw in japunxix tu'n ex axix toc tyol. Atzun jlu in tma'n Jesucrist: 15Ojtzki'n ke cybinchbene wu'ne. Ba'n wu'ne mya che'w ate'ye ex mya cyak ate'ye. Mas ba'nwtlo nokwit che'w ate'ye ex ka cyak. 16Pero tu'nju mya che'w ate'ye ex mya cyak, nok o'cx k'ulk'aj ate'ye, cyja'tzun che eletz ntzubane tuj ntziye. 17Porque in cyma'ne cyja': k'inun ko'ye, nimxix at keye, ex minti' ch'in atx taj keye, che chiye, pero minti' nne'l cynic'e ti'j ka puro tuj bis ate'ye, ex minti' jun ba'n at cyeye, meba keye, moẍ keye, ex minti' cyxbalune. 18Cyja'tzun cxel nk'o'ne jun cyconseje: Cylak'onxe k'an pwak wuc'ile, saksa'maj tu'n k'ak', tu'ntzun cyoque k'inun; ex cylak'onxe sak xbalun wuc'ile tu'n toc cyi'je tu'ntzun mi'n cych'ixwiye tu'nju minti' cyxbalune toc; ex cylak'onxe tk'anbil cywitze wuc'ile tu'n tocx cyk'o'ne tuj cywitze tu'ntzun tbanix cywitze. 19Akeju c'ujla'n wu'ne in che'x ncawine ex in che cub tuj castiw wu'ne. Cyja'tzun tz'oc tililx cyu'ne ex tajtz ti'j cyanmiye. 20Lu kine atine ttzi ja ex in chin k'ajtzane; ka at jun ma binte tk'ajk'ajel nwi'ye ex ma tz'ocx tjako'n tlamel ja, chin oquexe tuc'il, ex chin wa'le tuc'il, ax icx te cwa'l wuc'ile. 21Alcye ma cub ti'j mya ba'n tu'n, cxel nma'ne te tu'n tcub ke' wuc'ile tuj nk'ukbile jatum in chin cawine, ic tza'n weye ma cub ti'j mya ba'n wu'ne, ex ma chin cub ke'ye tuc'il Nmane tuj tk'ukbil. 22Alcye at t-ẍcyin, binx aju in tma'n Xewbaj Xjan cye cycyakil ocslal tuj junjun tnam.

will be added

X\