Apocalipsis 20

1Ex o wile jun anjel cyja' tcu'tz tuj cya'j, k'i'n tal ja tu'n te jul jalo ponin t-xe', tuc'ix jun caden ma'xix tzyu'n tu'n. 2Ex tzyet aju jil dragón tu'n, aju ojtxi lobaj, atzun tajaw ilju ex Satanás; ex bajtzun c'alo'n tu'n anjel tu'n tten c'alo'n tuj jun mil abk'i. 3Ex cu'x t-xo'n tuj jul jalo ponin t-xe', ex cyaj tlamo'n, ex cyaj t-seyarin tibaj tu'n mi'n t-sbun mastl cyi'j ke nasyon, ocxi tjapun baj jun mil abk'i. Ex tbajlenxitzun jun mil abk'i ctzokpeteltzun, pero mya nim k'ij. 4Ex o wile ke k'ukbil jatum tu'n cycawin keju otok cyc'am cyoclen tu'n tcub cysentens xjal cyu'n; ex e cub ke' cyibaj cyk'ukbil. Ex o wile cyanmi keju el tamtz'u'n cywi' tu'n tlaj xi cychic'ba'n ax toc ti'j Jesús, ex tu'n tlaj tyol Dios, akeju minti' e c'ulun twitz txcup ex mi twitz tilbilal txcup, ex minti' o cyc'am tu'n toc techal txcup tibaj cywitz ex ka ti'j cyk'ab. Ex o wile e jaw ank'in ex e cawin tuc'il Crist jun mil abk'i. 5Atzun tnejel ank'ibl jlu. Atzun ke mastl cyimni minti' e jaw ank'in, maxitzun e jaw ank'in tej tjapun jun mil abk'i. 6Akeju che jawil ank'in tuj tnejel ank'ibl at tzalajbil cye, ex ma che el tpa'n Dios tu'n cyajben o'cx te. Aju tcabin camic minti' toclen cyi'j jlu, nok o'cx che oquel te pal tu'n cyajben te Dios ex te Crist, ex che cawil tuc'il Crist jun mil abk'i. 7Octzun tjapun baj jun mil abk'i, c'eletztzun tzokpi'n Satanás tuj presbil te. 8Ex c'elextzun sbul cye nasyon ate' tuj tcyakil twitz tx'otx', aju nasyon Gog tuc'ix Magog, tu'ntzun cyoc tchmo'n tu'n cyk'ojin; ic cyajlal ic tza'n ttxa tz'a'n ttzi mar. 9Ex e tzaj tuj tcyakil twitz tx'otx', ex baj cytxolban cyib ti'jele cycampament ocslal ex ti'jele ju tnam c'ujla'nxix tu'n Dios; cu'tztzun k'ak' tuj cya'j tu'n Dios, ex bi'x e cub tz'e'y tu'n. 10Ex aju tajaw il aju o sbun cye, cu'x xo'n tuj najab in c'ant tu'n k'ak' ex tu'n azufre, jatum ta'tok ju txcup tuc'ix ju pacbal nic'al yol; ex che c'ixbisetel k'ijl ex konic'an tuj tcyakil tabk'iyil te jumajx. 11Ex o wile jun k'ukbil ma'xix ex sak jatum in cawin Dios, ex o wile aju k'ukl tuj k'ukbil. El ok tx'otx' twitz tuc'ix cya'j, ex bi'x e cub naj. 12Ex o wile ke cyimni, keju ma' cyoclen ex keju ch'in cyoclen, wa'l ke kwitz Dios; ex e jaket ke libro, ex at juntl libro jaket, aju libro te chwinklal. Cubtzun cysentens ke cyimni, ex ju cysentens cub ic tza'nxju cybinchben tz'iban cyuj libro. 13Ex xi tk'o'n mar ke cyimni ate' tuj; ex ju camic tuc'ix ju cynajbil cyimni xi cyk'o'n ke cyimni ate' cyuj; ex teyle junjun cub t-sentens ic tza'nxju tbinchben. 14Atzunju camic tuc'ix ju cynajbil cyimni e cu'x xo'n tuj najab in c'ant tu'n k'ak'. Atzun tcabin camic jlu. 15Ex alcye minti' cnet tbi tz'iban tuj tu'jil chwinklal, cu'x xo'n tuj najab in c'ant tu'n k'ak'.

will be added

X\