Apocalipsis 17

1Tzajtzun jun cye keju wuk anjel, akeju k'i'n wuk lak cyu'n, ex tzaj yolin wuc'ile ex tma: —Tzaja tzalu, cxel nyec'une teya aju sentens cbel tibaj ju xu'j jawni twitz cyuc'il xinak, aju k'ukl cyibaj nimcu a'. 2Ke rey twitz tx'otx' ma che yaẍin tuc'il, ex ke xjal najl ke twitz tx'otx' ma chyo'n cywi' tu'nju ma txi' cyc'a'n vin tzaj tk'o'n xu'j cye, aju vin atzun in yolin ti'j tyaẍbil xu'j. 3Ic tza'n tuj witzic' tzaj tyec'un Xewbaj Xjan weye, inx k'i'ne tu'n anjel tuj lugar minti' cynajbil xjal tuj. Ex wile jun xu'j k'ukl tibaj jun txcup cyak ti'j, ex tz'iban nimcu biybaj ti'j txcup te yasbil ti'j Dios, ex at wuk twi' txcup ex laj tcach. 4Aju xu'j toc t-xbalun tbanilxix, ẍjulin ex cyak que'yin, ex tbinchan tib xu'j wen, toc k'an pwak ti'j tuc'ix tal abj tbanilxix cyuc'ix ke tal abj perla cybi, ex tzyu'n jun lak tu'n k'an pwak ttx'otx'il, nojni tu'n ttzuwil ex tu'n ttz'ilil tyaẍben. 5Ex tz'iban jun biybaj tibaj twitz xu'j, mlay tz'el knic' ti'j; atzun jlu: Nintz tnam Babilonia, aju cytxu' ke xu'j jawni cywitz cyuc'il xinak ex ttxuylal aju ttzuwil at twitz tx'otx'. 6Ex o wile chyo'mni twi xu'j tu'n cychc'el ocslal ex tu'n cychc'el keju otok che cub byo'n tu'nju testiw ke ti'j Jesús. Ex tej nlonteye jlu, bi'x naj nnable. 7Atzunte anjel tzaj tma'n weye: —¿Tik'un ma naj tnabla? Cxel nma'ne teya aju na'nx tk'ancha'lin ti'j ju xu'j lu ex ti'j ju txcup aju ikalte xu'j, aju at wuk twi' ex laj tcach. 8Aju txcup ma tila at nej, pero minti'tl ja'lo; pero ch'ix tjatz tuj jul jalo ponin t-xe' tu'n t-xi' tuj najen; ex ke xjal najl twitz tx'otx' che labil ti'j, akeju mya tz'iban cybi tuj tu'jil chwinklal atxix tej tbant twitz tx'otx'; che labil ti'j ju txcup oc cylonte, tu'nju at nej, pero minti'tl ja'lo, ex tzul juntl maj. 9Atzun tnabl jlu ka ma pujet cyu'ne: Aju wuk twi' txcup atzun wuk witzju, jatum in cub ke' xu'j cyibaj. 10Ax wuk rey keju wuk twi' txcup. Jwe' rey o che el, jun atx ja'lo, atzun juntl na'nx tul; octzun tul, ilxix ti'j tu'n tten, pero mya nim k'ij. 11Aju txcup at nej ex minti'tl ja'lo, axtzun twajxakin rey, ex ax jun cyxol keju wuk, ex cxe'l tuj najen. 12Ex keju laj cach ma tila, atzun keju laj rey, akeju na'nx cyc'monte cyoclen tu'n cycawin; pero nok junx or tu'n tten cyoclen te rey junx tuc'il ju txcup. 13Akeju laj rey lu junx cyximbetz, ex cxel cyk'o'n cyipumal ex cyoclen teju txcup. 14Che k'ojlel ti'j Tal Ẍne'l, pero cbel cyi'j tu'n Tal Ẍne'l; porque atzun Cyajaw cycyakil keju at cyoclen, ex atzun Rey cyibaj cycyakil ke rey; ex akeju ate' tuc'il txco'maj ke tu'n Dios ex sc'o'maj ke tu'n ex in japunxix cyu'n. 15Ax icx tzaj tma'n anjel weye: —Akeju a' ma tila jatum in cub ke' ju xu'j jawni twitz cyuc'il xinak, tnam ke, ex xjal ke nim cyajlal, ex nasyon ke, ex junxilchak cyyol. 16Ex keju laj tcach txcup ma tila c'elel cyic'un aju xu'j jawni twitz cyuc'il xinak, cnajel xu'j cyu'n, cyjel cyk'o'n minti' t-xbalun toc, cxel cychyo'n tchibjal, ex cbel cypatun tu'n k'ak'. 17Porque ma tma Dios tuj cyanmi tu'n cybinchante ju tajbil, tu'n tmoje' cyyol, ex tu'n t-xi cyk'o'n cycawbil te txcup acutzun in japun tyol Dios. 18Ex aju xu'j ma tila, atzunju nintz tnam aju in cawin cyibaj ke rey ate' twitz tx'otx'.

will be added

X\