Apocalipsis 15

1Ex o wile juntl techal ma'xix tuj cya'j, in labine ti'j: At wuk anjel k'i'n wuk c'ixbisabl cyu'n, atzun mancbil c'ixbisabl jlu, porque o'cxtzun cjapunel baj tk'oj Dios. 2Ex at juntl o wile ic que'yin ic tza'n mar, ic que'yin ic tza'n vidr t-sem tib tuc'il k'ak'; ex o wile akeju otok cub ti'j txcup cyu'n ex ti'j ju tilbilal, ex ti'j ju tajlal tbi, wa'l ke ttzi' mar ic que'yin ic tza'n vidr, tzyu'n chnab arpa cyu'n, aju tzaj tk'o'n Dios cye. 3Ex in che bitzan tbitz Moisés aju tmajen Dios, ex tbitz Tal Ẍne'l, in cyma'n: Ma'xix ke tbinchbena ex in ko labine cyi'j, aya Kman Dios at tipumala tu'n tbant tcyakil tu'na; tz'aklxix ke t-ximbetza ex axix toc, aya Rey cyibaj cycyakil nasyon. 4Cycyakil xjal che xobel twitza, ex cjawil cynimsa'n tbiya, aya Kman. Porque o'cx aya xjan; cyja'tzun cycyakil nasyon che tzajel tu'n cyc'ulun twitza, porque tuj tumelxix aju sentens ma cub tk'o'na, che chi. 5Tbajlenxitzun jlu, o wile jaket ttzi tja Dios tuj cya'j, aju ja xbalun te nabl Dios, jatum c'u'n ke tz'lom abj tz'iban tley Dios cywitz. 6Ex e je'tz wuk anjel tuj tja Dios, akeju k'i'n wuk c'ixbisabl cyu'n, toc cyxbalun sak wen ex in koptz'aj, binchamaj ti'j nok' lino, ex toc c'albil ttzi cyxu'c k'an pwak ttx'otx'il. 7Ex at jun cyxol keju cyaje querubín xi tk'o'n wuk lak k'an pwak cytx'otx'il cye keju wuk anjel, nojni ke lak lu tu'n castiw ctzajel tk'o'n Dios cyibaj xjal, aju Dios itz' tuj tcyakil tabk'iyil te jumajx. 8Ex o noj tja Dios tu'n t-sibel t-spic'umal Dios ex tipumal; ex mi a'l jun xjal tu'n tocx tuj tja Dios, maxitzun tu'n tocx oc tjapun baj aju wuk c'ixbisabl cyu'n wuk anjel.

will be added

X\