1 Entons in cub we'ye tibaj ttxa tza'n ttzi mar, ex o wile jatz jun txcup tuj mar at wuk twi' ex laj tcach, ex tjax junjun coron twi' junjun tcach, ex tz'iban tbi txcup ti'j junjun twi', te yasbil ti'j Dios. 2 Aju txcup o wile ic que'yin ic tza'n tigre, ke tkan ic che que'yin ic tza'n tkan jun jil oso, atzun ttzi' ic que'yin ic tza'n ttzi balun. Ex xi tk'o'n jil dragón tipumal txcup ex tu'n tcawin ex tu'n tten nim toclen. 3 Ex o wile jun twi' txcup otok c'ixbi mer ic tza'n otok cyim; pero aju tc'ixblen o banix, ex cycyakil xjal twitz tx'otx' e labin ti'j txcup, ex e oc lpe' ti'j. 4 Ex e c'ulun twitz ju jil dragón, aju xi k'onte toclen txcup, ex e c'ulun twitz txcup, ex cyma: —¿Alcye jun jacu pon ic tza'n te txcup lu, ex alcye jun jacu k'ojin tuc'il? Che chi. 5 Ex xi k'o'n ambil te txcup tu'n tyolin nimcu yol te tnimbil tib ex tu'n tyasun ti'j Dios; ex xi k'o'n toclen tu'n tcawin tuj 42 xjaw. 6 Ex oc ten yolil tu'n tyasun ti'j Dios ex tu'n tyasun ti'j tbi Dios ex ti'j ju ja xbalun te nabl Dios, ex cyi'j keju najl ke tuj cya'j. 7 Ex xi k'o'n ambil te tu'n tk'ojin cyi'j ocslal ex tu'n tcub cyi'j tu'n. Ax icx xi k'o'n toclen tu'n tcawin cyibaj cycyakil cyiyjil xjal, ex cycyakil tnam, ex cycyakil c'loj xjal junxilchak cyyol, ex cycyakil nasyon. 8 Ex cycyakil xjal twitz tx'otx' e c'ulun twitz txcup, akeju mya tz'iban cybi tuj tu'jil chwinklal atxix tbantlen twitz tx'otx'; aju tu'jil chwinklal lu te Tal Ẍne'l aju cub byo'n. 9 Ka at jun at t-ẍcyin, binx ju yol lu. 10 Akeju banin cyi'j tu'n cyxi k'i'n pres, che xel k'i'n pres; ex akeju banin cyi'j tu'n cycub byo'n tu'n spad, che bel byo'n tu'n spad. Cyja'tzun il ti'j tu'n tten cypasens ocslal ex tu'n tke' cyc'u'j ti'j Dios. 11 Ex tbajlenxi jlu o wile juntl txcup tzaj twitz tx'otx'; at cabe tcach ic tza'n tcach jun tal ẍne'l, pero o yolin ic tza'n jil dragón. 12 Ex junx ta' toclen ic tza'n toclen tnejel txcup, ex in cawin ttxlaj tnejel txcup, nno'c tk'o'n tilil cyi'j xjal najl ke twitz tx'otx' tu'n cyc'ulun twitz tnejel txcup, aju ch'ixtok tcyim nej tu'n c'ixble'n, pero o banix. 13 In tbincha'n ke techal ma'xix cyxilen; ax icx in cu'tz k'ak' tu'n twitz cya'j in cubil twitz tx'otx' cywitz xjal. 14 Ex in sbun cyi'j xjal najl twitz tx'otx', porque o tzaj k'o'n tipumal tu'n tbinchante ke techal twitz tnejel txcup, ex xi tma'n cye xjal najl twitz tx'otx' tu'n cybinchante jun tilbilal txcup, aju otok c'ixbisanjtz tu'n spad ex ank'intl. 15 Ex xi k'o'n tipumal tcabin txcup tu'n tocx tk'o'n t-xew tuj tilbilal tnejel txcup, tu'n tbant tyolin ju tilbilal ex tu'n cycub byo'n xjal tu'n, akeju minti' in che c'ulun twitz. 16 Ex xi tk'o'n txcup orden cye cycyakil xjal tu'n toc jun techal ti'j cybank'ab ex ka tibaj cywitz, tza'nx keju ch'in cyoclen icx keju ma' cyoclen, ke k'inun ex ke meba xjal, ke xjal tzokpi'n ke ex ke majen tzyu'n. 17 Ex tma txcup tu'n mi'n cylok'on xjal ex tu'n mi'n cyc'ayin ka minti' techal txcup toc cyi'j ex ka tbi ex ka tajlal tbi. 18 A jlu taj nim nabl tu'n tel knic' ti'j. Alcye at tnabl, ximanx ti'j alcye tajlal in ajben tu'n txcup, porque ax tajlal in ajben ti'j tbi jun xjal. Ex atzun tajlal jlu, 666.
Copyright ℗ 2000 Hosanna Grabado por Producciones Cristianas Vina