Apocalipsis 12

1Ex tzaj yec'un jun techal ma'xix tuj cya'j: at jun xu'j toc k'ij ti'j ic tza'n jun xbalun, ex tcub xjaw tjak' tkan; ex tjax jun coron tuj twi' toc cablaj che'w ti'j coron. 2Ex otok tz'oc ten tal xu'j ex in sch'in tu'n ta'w, ch'ixtok tul tal ex nno'c tuj c'ixc'oj tu'n tul itz'j tal. 3Ax icx tzaj yec'un juntl techal tuj cya'j: At jun jil ma'xix, dragón tbi, cyak ti'j, at wuk twi' ex laj tcach, ex tjax junjun coron tuj junjun twi'. 4Ex tu'n tje' dragón tzaj tjac'u'n toxin tnej che'w ate' tuj cya'j ex e cu'tz t-xo'n twitz tx'otx'. Atzun te jil dragón cub we' twitz xu'j aju ch'ixtok tul itz'j tal, tu'ntzun t-xi tchyo'n naj tal xu'j oc tul itz'j. 5ex xinak jun tal xu'j ul itz'j, ex ate ccawil cyibaj cycyakil nasyon tu'n var c'uxbil; jawtzun jubcha'n ju tal xu'j, ex xi k'i'n tuc'il Dios jatum ta' tk'ukbil. 6Atzunte xu'j el ok, xi' tuj lugar minti' cynajbil xjal tuj, atzun ta' jun tnajbil xu'j banin tu'n Dios, ex atzun tu'n tc'a'chanjtz tuj jun mil tuc'il 260 k'ij. 7Tbajlenxi jlu oc jun k'oj ma'xix tuj cya'j; ate Miguel cyuc'ix ke t-anjel e k'ojin ti'j ju jil dragón; ax icx ju jil dragón cyuc'ix ke t-anjel e k'ojin. 8Pero minti' e xcye' ti'j Miguel; ex minti'tl tumel tu'n cyten tuj cya'j. 9Cyja'tzun etz xo'n ju nintz jil dragón, aju ojtxi lobaj, aju toc tbi tajaw il ex Satanás, aju in sbun cyi'j cycyakil xjal twitz tx'otx'; cu'tz xo'n twitz tx'otx', ex cyuc'ix ke t-anjel e cu'tz xo'n tuc'il. 10Xitzun nbi'ne jun tk'ajk'ajel cyuwxix tuj cya'j, in tma'n: —Ja'lo ma tzul aju colbil tu'n Kdios, tuc'ix tipumal ex tcawbil, ex ma pon tk'ijlalil tu'n tcawin Crist aju at toclen tu'n Dios; porque ma tz'ex xo'n tajaw il aju in si'min yol cyi'j kerman, aju in si'min yol cyi'j twitz Kdios k'ijl ex konic'an. 11Ex ma cub ti'j tajaw il cyu'n, nok tu'nju tchc'el Tal Ẍne'l, ex tu'nju yol ax toc xi cychic'ba'n; porque minti' cub cyximan ka ma'xix toclen cychwinklal, nok o'cx cyk'on cyib tu'n cycyim. 12Tu'ntzun jlu tzalajxa cya'j, ex che tzalajxe akeye najl keye tuj cya'j. Pero bec'bil cywitze akeye najl twitz tx'otx' ex tuj mar. Porque ma cu'pun tajaw il cyxole tuc'il nim tk'oj, porque ba'n tu'n mya nim k'ij tu'n ttentl. 13Tejtzun tna'nte jil dragón ka otok cu'tz xo'n twitz tx'otx', oc ten k'ojlel ti'j xu'j, aju xinak tal otok tzul itz'j. 14Atzunte xu'j xi k'o'n cabe t-xic', aju t-xic' nintz t'iw, tu'ntzun tel ok twitz lobaj tu'n tpon lipan tuj lugar minti' cynajbil xjal tuj, ex tu'n tpon tuj tlugar jatum tu'n tc'a'chanjtz ox abk'i tuc'il mey. 15Atzunte lobaj jatz a' tuj tkul ic tza'n jun nima, xi ttilin ti'j xu'j tu'n t-xi ikan xu'j tu'n a'. 16Pero ate tx'otx' onin ti'j xu'j, porque xi c'abchaj tx'otx', ex xi tc'a'n tx'otx' a' aju jatz tuj tkul jil dragón. 17Tzajtzun nimxix tk'oj jil dragón ti'j xu'j, ex xi' k'ojlel cyi'j ch'intl tiyjil xu'j, akeju in japun tmandamyent Dios cyu'n ex cucx in xi cychic'ba'n ax toc ti'j Jesucrist.

will be added

X\