Apocalipsis 11

1Ex tzaj k'o'n jun ajlaj weye ic tza'n jun tze' te echbil, ex tzaj k'ma'n weye: —We'ctza, echanxa tja Dios tuc'ix ju altar, ex ajlanxa jte' xjal in che c'ulun tuj. 2Atzunju ttxa'n pe'n ti'jtzi tja Dios, k'oncja, mi'n cub techana, porque o txi k'o'n cye txkantl xjal tuj juntl nasyon; ex cbajel cywaban ju tnam xjan tuj 42 xjaw. 3Ex cxel nma'ne cye keju cabe testiw wi'je tu'n t-xi cychic'ba'n cye xjal aju cxel nma'ne cye, ex tu'n cyyolin tuj jun mil tuc'il 260 k'ij, toc cyxbalun ch'i'x twitz. 4Akeju cabe testiw lu, atzun keju cabe tze' olivo ex atzun keju cabe cycubil candil wa'l ke twitz Dios aju Tajaw tx'otx'. 5Ka at jun xjal taj tu'n tc'ixbisan cyi'j, c'eletz k'ak' tuj cytzi', bi'x che bel tz'e'y ke aj k'oj cyi'j; ex akeju cyaj tu'n cyc'ixbisan cyi'j, ictzun tten che cymelju. 6At cyoclen cabe testiw lu tu'n tlamet cya'j cyu'n, tu'n mi'n ttzaj jbal tuj tk'ijlalil oc t-xi cychic'ba'n aju cxel tma'n Dios cye; ex at cyoclen cyibaj a' tu'n cyoc te chic'; ex at cyoclen tu'n cyc'ixbisante tcyakilju at twitz tx'otx' tu'n nok alcyex c'ixbisabl, ex nok jte'x maj cyajbil. 7Octzun tjapun baj cyak'un aju tzaj k'ma'n cye tu'n Dios, c'oquel ten txcup k'ojlel cyi'j, aju cjawitz tuj jul jalo ponin t-xe', ex cbel cyi'j tu'n ex che bel tbyo'n. 8Atzun cyximlal cyimni che cyjel tx'ile' tuj plas tuj nintz tnam jatum jaw k'o'n Kajaw twitz crus, aju tnam oc k'o'n tbi Sodoma ex Ejipt, nok jun techal jlu. 9Ex ke xjal te junjun tnam ex te junjun c'loj xjal junxilchak cyiyjil ex junxilchak cyyol ex ke xjal te junjun nasyon, oc cyila' cyximlal cyimni tuj ox k'ij tuc'il mij, ex mlay cycuyi tu'n cycu'x maku'n. 10Ex ke xjal najl ke twitz tx'otx' che tzalajel cyi'j tu'nju otok che cyim, ex che ic'sal nink'ij, ex cxel cysama'n oyaj jun te juntl; porque akeju cabe t-sanjel Dios lu otok che yajlanjtz xjal cyu'n twitz tx'otx'. 11Pero tbajlenxi ox k'ij tuc'il mij tzaj tk'o'n Dios T-xew ex ocx cyuj tu'n cyjaw ank'in, ex e jawtzun we'; ex tzaj nim cyxobil keju e que'yinte cye. 12Entons akeju cabe testiw lu o cybi jun tk'ajk'ajel ma'xix tzaj tuj cya'j, ex tzaj tma'n cye: —Cyjatze tzalu. Ex e jax tuj cya'j tuj jun muj, ex e ilwaj cyu'n ke aj k'oj cyi'j. 13Ax or tzaj jun cyaknajnab cyuwxix, ex aju tlajin piẍ tnam bi'x cub xitj; aju cyajlal xjal e naj tu'n cyaknajnab, wuk mil. Atzun ke mastl xjal bi'x e jaw sec'paj, ex jaw cynimsa'n tbi Dios aju at tuj cya'j. 14Aju tcabin c'ixbisabl ma tzic'; lu tzul naj aju toxin. 15Ex oc k'ajtza'n chun tu'n twukin anjel, ex akeju ate' tuj cya'j jaw tk'ajk'ajel cywi' cyuwxix, ex cyma: Ke cawbil ate' twitz tx'otx' ma che oc te tcawbil Kman ex te tcawbil Crist aju at toclen tu'n; ex atzun te ccawil tuj tcyakil tabk'iyil te jumajx, che chi. 16Entons akeju 24 tij xjal k'ukl ke tuj cyk'ukbil twitz Dios, e cub ẍmeje' tejxi tpon tacl tibaj cywitz twitz tx'otx' ex e c'ulun twitz Dios, 17ex cyma: Cxel kk'o'ne chjonte teya, Kman Dios, aya at tipumala tu'n tbant tcyakil tu'na, aya at ja'lo ex aya at ojtxi, [ex tzula,] porque ma tzaj tyec'una tipumala nimxix ex ma tzyet tcawina. 18Ma tzaj cytx'u'jil ke nasyon ti'ja, pero ma tzul canun k'ij tu'n ttzaj cycastiw, ex ma pon tk'ijlalil tu'n tcub cysentens cyimni tu'na, ex tu'n t-xi tk'o'na jun oyaj cye t-sanjela, akeju tmajena, ex cye ocslal, ex cye keju in che niman teya, keju ch'in cyoclen ex keju ma' cyoclen, ex ma pon tk'ijlalil tu'n cynaj keju ma naj twitz tx'otx' cyu'n, che chi tij xjal. 19Jakettzun ttzi tja Dios tuj cya'j, ex tuj tja Dios o ilwaj aju cax jatum c'u'n aju yol cyaj bant ti'j tu'n Dios cyuc'il xjal. Ex tzaj tkan k'ancyok tuc'ix k'ancyok in jululun, tuc'ix jun cyaknajnab, ex nim sakbakun.

will be added

X\