Apocalipsis 10

1Ex o wile juntl anjel nim tipumal cu'tz tuj cya'j, tocx tuj muj, tjax t-xmacal lobaj tuj twi'. Atzun twitz anjel ic que'yin ic tza'n k'ij, atzun ke tkan ic tza'n tkan k'ak' ma' tc'itz. 2Tzyu'n jun tal u'j tu'n, jako'maj, ex aju tkan tuj tbank'ab cub tk'o'n tibaj mar; atzun juntl tkan tuj tnayaj cub tk'o'n twitz tx'otx'. 3Jawtzun tk'ajk'ajel twi' cyuwxix ic tza'n in tzanun jun balun; ex tej tjaw sch'in, e k'ajt wuk k'ancyok. 4Tejtzun cybaj k'ajt ke wuk k'ancyok, cyja'tok tcub ntz'ibane jlu; pero o nbiye jun tk'ajk'ajel tzaj tuj cya'j, tzaj tma'n weye cyja': —Aju ma cyma wuk k'ancyok, mi'n tz'el tkanil tu'na, ex mi'n cub ttz'ibana, chi weye. 5Ex aju anjel aju o wile wa'l tibaj mar ex tibaj tx'otx' jaw tk'o'n tbank'ab twitz cya'j, 6ex xi tma'n jun yol axix toc twitz Dios aju itz' tuj tcyakil tabk'iyil te jumajx, aju o binchante cya'j tuc'ix tcyakilju at twitz, ex o binchante tx'otx' tuc'ix tcyakilju at twitz, ex o binchante mar tuc'ix tcyakilju at tuj. Ex tma anjel: —Mlay txi lak'e' mastl tuj tk'ijlalil; 7porque tuj tk'ijlalil oc toc k'ajtza'n chun tu'n twukin anjel, cjapuneltzun aju yol ewantok tu'n Dios nej, ic tza'n o tma cye t-sanjel akeju tmajen. 8Ex aju tk'ajk'ajel o nbiye tzaj tuj cya'j, tzaj yolin juntl maj wuc'ile, ex tzaj tma'n cyja': —Txi'ya, ex c'montza aju tal u'j catl, aju tzyu'n tu'n anjel aju wa'l tibaj mar ex tibaj tx'otx'. 9Inxtzune tuc'il anjel, xi nma'ne te tu'n ttzaj tk'o'n ju tal u'j weye. Atzun te tzaj tma'n weye: —Tzyuma ex wa'nxa; chi' c'oquel tuj ttzi'ya ic tza'n ta'l cab, atzun tuj tc'u'ja, c'a c'oquel. 10Tzajtzun ntzyu'ne aju tal u'j tuj tk'ab anjel ex xi nwa'ne; puro chi' oc tuj ntzi'ye ic tza'n ta'l cab, pero tej tbaj nwa'ne, puro c'a oc tuj nc'u'je. 11Tzajtzun tma'n weye cyja': —Ilxix ti'j tu'n t-xi tpacba'na juntl maj aju ctzajel tma'n Dios teya, ex tu'n tyolina cyi'j nimcu tnam ex cyi'j nimcu nasyon ex cyi'j nimcu c'loj xjal junxilchak cyyol, ex cyi'j nimcu rey, chi weye.

will be added

X\