Apocalipsis 1

1Aju tz'iban tuj u'j lu, atzunju tzaj tchic'ba'n Jesucrist. Tcyakil jlu tzaj tma'n Dios te tu'n t-xi tchic'ba'n cye tmajen tcyakilju at tu'n tul naj. Ex tzaj t-sama'n Jesucrist t-anjel, ex tu'nju anjel tzaj tchic'ba'n weye, akine Juan, tmajen Dios kine. 2Ma txi nchic'ba'ne tcyakilju ma wile, ex ma chin oque testiw ti'j tyol Dios ex ti'j ju yol axix toc tzaj tchic'ba'n Jesucrist. 3At tzalajbil cye xjal in che sch'in cyi'j ke yol tuj tu'jil lu, ex at tzalajbil cye keju in che bin ti'j tyol Dios ex in japun cyu'n aju tz'iban tuj; porque aju tk'ijlalil in lake'x ttzaj. 4Akine Juan in xi ntz'ibane cyeye, ocslal keye ate'ye cyuj wuk tnam tuj tx'otx' Asia: Tzajwit k'o'n xtalbil cyeye ex tu'n tke'xix cyc'u'je tu'n Dios aju at ja'lo ex at ojtxi ex tzul, ex cyu'n ke wuk Xewbaj ate' twitz tk'ukbil jatum in cawin, 5ex tu'n Jesucrist aju testiw axix toc tyol, ex aju tnejel jatz ank'in cyxol cyimni, ex ate cawil cyibaj rey ate' twitz tx'otx'. Ate Crist c'ujlal ke, ex ma ko tzokpet tu'n tuj kil tu'nju tchc'el, 6ex ma ko oc tk'o'n te rey ex ma ko oc te pal tu'n kajben te Dios aju Tman. O'cxwit te tu'n tnimanjtz ex tu'n tcawin tuj tcyakil tabk'iyil te jumajx. Icxwitju. 7Lu tzul Crist tuj muj. Cycyakil xjal oc cyila', ax icx keju e oc xayunte te oc cyila'; ex cycyakil tnam twitz tx'otx' che ok'el tu'n cyxobil tu'n tlaj. Cbantel icju. Icxwitju. 8Akine atine t-xe tnejel ex cucx chin tele oc tjapun baj mancbil tk'ijlalil, ic tza'n ju letr A ex Z, chi Kman Dios aju at ja'lo, ex at ojtxi, ex tzul, ex at tipumal tu'n tbant tcyakil tu'n. 9Akine Juan cyermaniye, ex ax yajbil nnic'x wu'ne ic tza'n cyeye nnic'x cyu'ne, ex junx koclen cyuc'ile tuj tcawbil Dios, ex at kpasens tu'n tic'x ku'n tu'n tipumal Jesucrist. Presintok kine tuj ju tal tx'otx' tmijil mar Patmos tbi. Presintok kine tu'n tlaj in xi npacba'ne tyol Dios ex tu'n tlaj in xi nchic'ba'ne aju yol ti'j Jesucrist. 10Tuj tk'ij Kajaw cub ten tipumal Xewbaj Xjan wibaje, ex o nbiye jun tk'ajk'ajel ma'xix wi'jxiye, ic tza'n tk'ajk'ajel chun, 11in tma'n: [—Akine atine t-xe tnejel ex cucx chin tele oc tjapun baj mancbil tk'ijlalil, ic tza'n ju letr A ex Z.] Aju c'oquel tque'yina, tz'iban cu'xa tuj jun libro, ex samanxa cye ocslal ate' tuj wuk tnam tuj tx'otx' Asia: Tuj Efeso, tuj Esmirna, tuj Pérgamo, tuj Tiatira, tuj Sardis, tuj Filadelfia, ex tuj Laodicea, chi weye. 12Ajtzun nque'yine tu'n nlonteye alcyeju in yolintok wuc'ile; ex tej taj nque'yine, o wile wuk candil k'an pwak cytx'otx'il, 13ex cyxol ke wuk candil, o wile jun ic que'yin ic tza'n jun xinak toc t-xbalun ẍjo'w, ex toc jun c'albil ttzi t-xu'c, k'an pwak ttx'otx'il. 14Aju twi' ex ju ttzmal twi' sak que'yin ic tza'n sak lan, puro sak ic tza'n ttxa che'w; ke tbak' twitz in che koptz'aj ic tza'n tkan k'ak'. 15Ex ke tkan in che koptz'aj ic tza'n k'an c'uxbil in koptz'aj tocx tuj k'ak'; ex ju tk'ajk'ajel twi' ic tza'n tk'ajk'ajel nimcu a' in jululun. 16Ex tcub wuk che'w tuj tbank'ab, ex nne'tz jun spad tuj ttzi', banin ttzi' wen te cycabil pac'; ex ic que'yin twitz ic tza'n t-spic'umal k'ij in koptz'ajxix wen. 17Tej nlonteye, in cub tz'ake t-xe tkan, ic tza'n cyimni in oque. Atzun te cub tk'o'n tbank'ab wibaje, ex tma weye: —Mi'n xoba; akine tnejel ex mancbil, 18ex itz' kine; in cyime, pero ja'lo itz' kine te jumajx; ex tuj nk'abe ate' ke tal ja te camic ex te cynajbil cyimni. 19Tz'iban cu'xtzuna tcyakilju ma tila, cyuc'ix keju ate' ja'lo ex keju oc tila'ya yajxi. 20Akeju wuk che'w ma tila tuj nbank'abe ex keju wuk candil k'an pwak cytx'otx'il, atzun cyxilen jlu: Keju wuk che'w, atzun ke anjel ate' cyxol ocslal cyuj wuk tnam, ex keju wuk candil, atzun ke ocslal ate' cyuj wuk tnam.

will be added

X\