SALMOS 99

1Ate Kman in cawin, tcubsa'n tk'ukbil cyibaj ke querubín. In che jaw lu'lun ke nasyon tuc'ix enter tx'otx'. 2Ma'xix toclen Kman tuj tnam Sión; ma'xix toclen cyibaj cycyakil tnam. 3Nimanxwit tbi, ma'xix toclen ex xobajilxix; Ate Dios xjante. 4Aya jun rey ma'xix tipumal in tzalaja tu'n tbant aju tz'aklxix; tu'na cub tk'o'na jun ley tuj tumelxix, o tbinchaya aju tz'aklxix ex aju tjikumal ti'j cyi'j aj Israel. 5Cynimsa'n jawe Kman aju Kdios, ex che ẍmeje'cuye twitz tk'ukbil. Ate Dios xjante. 6Ate Moisés tuc'ix Aarón at cyoclen ic tza'nx ke pal; atzunte Samuel at cyxol keju in jaw cynimsa'n tbi Kman. Tej t-xi cykanin onbil te Kman, e tzaj tzak'we'n tu'n. 7O yolin Dios cyuc'il max tuj jun muj otok cub ten cyibaj, ex o che japun ke tmandamyent cyu'n tuc'ix ju ley xi tk'o'n cye. 8Aya Kman Dios e je'x ttzak'we'na ke. Cub tnajsa'na cyil, pero ax icx cub tk'o'na cycastiw ti'j cybinchben mya ba'n. 9Cynimsan jawe Kman Dios, che ẍmeje'cuye twitz twi witz xjan aju etzan tu'n. Porque ate Kman Dios xjante.

will be added

X\