SALMOS 97

1Tzalajxa aya tx'otx'. Che tzalajxe akeye tx'otx' cyocx tuj tmijil mar nimxix cybaje. Ate Kman reyte. 2Txolin ti'jele tu'n k'ek muj; in cawin tuj tumel ex tz'aklxix tcyakilju in bant tu'n; 3nejni k'ak' twitz ex tu'n in che tz'e'y ke aj k'oj ti'j, akeju txolin cyten ti'jele. 4Aju xle'laj cya'j in tzaj t-sama'n in t-spic'ba'n twitz tx'otx', ex in jaw lu'lun tx'otx' oc tque'yinte jlu. 5Twitz Kman aju tajwil tcyakil twitz tx'otx' in che cub ulj ke witz ic tza'n xcab. 6Aju cya'j nno'c ten yolil ti'j, tz'aklxix te Dios; cycyakil tnam in cyil aju tajwalil. 7E ttzaj cych'ixwi keju in che c'ulun cywitz ke tilbilal, akeju in che tzalaj cyi'j. Cycyakil keju nno'c cydiosin xjal oc che bel moc'e' twitz Kman. 8Nman Dios, aju tnam Jerusalén cyuc'ix ke tnam ate' tuj tx'otx' Judá in che tzalaj tu'nju in cawina tuj tumelxix; 9porque ma'xix toclena Nman, tcubsa'na tibaj tcyakil twitz tx'otx', ex ma'xix toclena cywitz cycyakil keju nno'c cydiosin xjal. 10Akeye at cyc'ujlalile ti'j Kman, cyic'un ele aju mya ba'n. Tu'n Kman in che clet keju in che niman te; in che clet tu'n tu'n mi'n cycub tz'ak tuj cyk'ab ke xjal mya ba'n. 11In koptz'aj spic'un cywitz keju tz'aklxix; at tzalajbil cye xjal ba'n cymod. 12Che tzalajxe ti'j Kman akeye xjal tz'aklxix, ex cynimsa'n jawe aju tbi xjan.

will be added

X\