1 Cybitzanxe jun ac'aj bitz te Kman; che bitzane te Kman cycyakile najlkeye twitz tx'otx'; 2 che bitzane ex cynimsa'n jawe tbi; tcyakil k'ij cyk'onxe tkanil colbil tu'n. 3 Che yoline ti'j tajwalil ex ti'j tbinchben ma' t-xilen cye cycyakil xjal ex cye cycyakil nasyon, 4 porque ma' t-xilen Kman ex ba'n tu'n tjaw nimset tbi; mas tu'n kxob twitz cywitz ke mastl cydios xjal. 5 Ke cydios mastl tnam minti' cyajben, atzunte Kman o bant cya'j tu'n. 6 Txolin ti'j tu'n tajwalil ex tu'n t-spic'umal. At nim tipumal tuj tja ex puro tbanil. 7 Cycyakile akeye xjal najl twitz tx'otx' cynimsa'n jawe tbi Kman, cynimsa'n jawe tbi tu'nju at tipumal ex tajwalil. 8 Cyk'onxe nimbil te Kman tu'nju ma' t-xilen, cyi'ntze oyaj ex cyocxe tuj tja. 9 Che c'ulune twitz Kman tu'nju tbanilxix ex xjante. Cycyakile akeye xjal najl twitz tx'otx' che lu'lune tu'n cyxobile twitz. 10 Cymanxe cye mastl nasyon cyja': Ate Kman in cawin. Tu'n cub tk'o'n t-simyentil tx'otx' tu'n mi tyucch; parej in cawin Dios cyibaj cycyakil tnam. 11 E ttzalaj cya'j tuc'ix tx'otx'; e tjulin mar tuc'ix tcyakilju at tuj. 12 Ba'n tu'n cytzalaj ke cojbil tuc'ix tcyakilju at cywitz, ex e cyjaw sch'in ke tze' tuj c'ul tu'n tzalajbil 13 twitz Kman aju tzul. Ax toc, tzul tu'n tcawin twitz tx'otx'; aju tcawbil cyibaj ke tnam twitz tx'otx' tz'aklxix te ex axix toc.
