1 Cytzaje, ko bitzan te Kman tu'n tzalajbil; ko bitzan te Dios aju ic tten ic tza'n jun pic in ko clet tu'n. 2 Ko lak'ex twitz tuc'il ak'bil chjonte, ex ko bitzan bitz te nimbil te. 3 Porque ate Kman Dios ma'xix toclen, ex a rey mas ma' toclen cywitz mastl cydios xjal. 4 Tuj tk'ab ate' ke lugar tjak'xi tx'otx', ex te keju witz ma' cywa'l. 5 Te Dios aju mar, porque tu'n o binchet; ex tu'n tk'ab binchet aju tx'otx'. 6 Cytzaje, ko ẍmejec tu'n kc'ulun te; ko ẍmejec twitz Kman, porque a binchante ke. 7 Ate Kdios, atzun ke etzan ko' tu'n; ic ko' ic tza'n t-ẍne'l, porque cwentin ko' tu'n. 8 Cybinxe ja'lo aju in tma'n cyeye: Mi'n cub cycyuwsa'ne cyanmiye ic tza'n o cybincha ke cyxe'chele tuj lugar Meriba, ex ka ic tza'n o cybincha tuj lugar Masah tuj tzkij tx'otx', 9 tej woque tuj joybil wi'je cyu'n ex tej nprobarinjtze cyu'n, masque otok cyil ke nbinchbene. 10 O tzaj nk'oje cyi'j ke cyxe'chele 40 abk'i ex o nmaye: Ke xjal lu cucx in txalpuje' cyanmi, ex mi cyaj tu'n t-xi cyniman nyole. 11 Cyja'tzun o tzaj nk'oje cyi'j ex xi nma'ne jun nyole axix toc cye, tu'n mi'n cyocx tuj tx'otx' jatum tu'n cyojlan wu'ne, chi Dios.
