1 Yec'untz tiba Nman, aya Dios in cub tk'o'na cycastiw xjal. 2 Aya jwes tibaj tcyakil twitz tx'otx'; we'ctza cyi'j keju in jaw cyniman cyib ex k'on cuba cycastiw. 3 ¿Jtojtzun Nman, jtoj txi cycolin tu'n cytzalaj ke binchal mya ba'n? 4 Cycyakil ke binchal mya ba'n nim in che xmayin, in jaw cyniman cyib ex in baj cyyolin cyib. 5 Nman Dios, cyu'ntzun ke jlu in che baj yajla'n ke xjal etzan tu'na. 6 In cub cybyo'n ke meba xu'j ex ke stranjer xjal ex cyuc'ix ke c'wa'l minti' cyman ex cytxu'. 7 In cyma'n: Minti' in til Dios, aju Tdios Jacob minti' toc tcwent ti'j, che chi. 8 Tz'exwit tuj cywi'ye, akeye xjal miban tz'ocx jun yol tuj cywi'ye ex minti' cynable. ¿Jtoj ban tel cynic'e ti'j? 9 ¿Mlaypetzun tbi aju binchante t-ẍcyin xjal? ¿Ex mlaypetzun til aju binchante tbak' twitz xjal? 10 ¿Mi'npetzun cub cycastiw tu'n Dios, aju in xi mayonte cye ke nasyon? ¿Ex mlaypetzun tz'el tnic' Dios ti'j, aju in k'onte xnak'tzbil cye xjal ti'j ojtzkibl? 11 Ba'n tu'n Kman, o'cx in che ximan xjal ti'j aju minti' tajben. 12 Nman Dios, at tzalajbil teju xjal aju in xi tcawina ex in xi tk'o'na xnak'tzbil te ti'j tleya, 13 tu'ntzun tten tuj txubtxaj oc tpon tk'ijlalil mya ba'n. Atzun cye xjal mya ba'n cbelex lacu'n jul tu'n cyxi tz'ak tuj. 14 Mlay cyaj tcolin Kman ke xjal etzan tu'n, ex mlay che cyaj tk'o'n cyjunalx. 15 Tzul tk'ijlalil juntl maj cxel binchet cyi'j xjal tuj tumelxix, ex cycyakil xjal tz'aklxix ba'n c'elel tuj cywitz. 16 ¿Alcye jun jacu tzul colol wi'je cywitz ke xjal ploj cymod ex binchal mya ba'n? 17 Nokwit minti' onin Kman wi'je, luwtlo kine atine tuj cynajbil cyimni. 18 Tej t-xi nma'ne: In che'x jilj nkane, nchitzune, ula onil weye tuc'il tc'ujlalila, Nman. 19 Oc in tzaj nximbetze ex in baj nc'u'je, in tzaj tk'ukba'na nc'u'je ex in tzaj tk'o'na tzalajbil. 20 Mlay moje' tyola cyuc'il ke jwes mya tz'akl, akeju minti' in xi cybincha'n cyi'j xjal tuj tumel ic tza'n in tma'n ley, 21 in che yolin ti'j cyxolx tu'n tcub tcastiw xjal minti' til ex ba'n tmod, ex in cub cyk'o'n t-sentens tu'n tcyim. 22 Atzunte Kman colol wi'je; ic tten Dios te weye ic tza'n jun pic nno'c nclon wibe ti'j. 23 Oc che najel ke xjal mya ba'n tu'n Kman; tu'nx cybinchben mya ba'n che najel. Oc che najel tu'n Kman Dios.
