1 Aju xjal nno'cx tewan tib tuc'il Dios tu'n tclet, c'ank'il tjak' t-xmu'jil Dios aju Tajaw Tcyakil ex at tipumal tu'n tbant tcyakil tu'n. 2 Cxel nma'ne te Kman cyja': Aya jun ja cyuw binchben te jatum tu'n tocx nclon wibe, aya Ndiose k'ukl nc'u'je ti'ja, nchiloye te. 3 O'cx a Dios jacu clonte teya te c'obil tcubsa'n tuj ewaj ex jacu cleta tu'n te tx'u'j yabil, 4 porque cyjel tena tjak' t-xic' tu'n tke' tc'u'ja. Aju tyol axix toc c'ajbel te colbil teya ic tza'n jun makbil. 5 Mlay xoba twitz ju xobtzal in bet konic'an, ex mlay xoba cywitz ke plech in che tzaj xo'n ti'ja k'ijl. 6 Mlay xoba te tx'u'j yabil in bet tuj klolj, ex mlay xoba te c'ixbisabl in che naj xjal tu'n te k'ijl. 7 Che bel byo'n jun mil xjal ate' tuj tnayaja ex laj mil tuj tbank'aba, atzun teya minti' cbajel ti'ja. 8 Oc tila'ya jlu tu'n twitza ex oc tila'ya oc tcub cycastiw ke binchal mya ba'n. 9 Tu'nju ma tz'oc Kman te tcolbil tiba ex ma tz'oc tclon tiba ti'j Dios aju ma'xix toclen, 10 mlay tc'ulbaya jun mya ba'n ex mlay canun tx'u'j yabil tuj tjaya. 11 Che tzajel t-sama'n ke anjel tu'n toc cwentina cyu'n nok jatum ma txi'ya. 12 Cxel k'i'na cyu'n tu'n cyk'ab tu'n mi'n toc tacpaj tkana ti'j abj. 13 Che bel twabana ke balun cyuc'ix ke k'anti', icx ke balun k'i'n cyipun ex ke lobaj. 14 Chi Dios in tma'n: Oc cletel ju ocslal wu'ne, ex cjawix nk'o'ne tuj lugar segurxix, tu'nju ma tz'el tnic' wi'je ex at tc'ujlalil wi'je. 15 Oc tcubsan nwitze ctzajel nk'o'ne te aju in tkanin; ex akine chin tel tuc'il. Oc cletel wu'ne oc ttzaj joybil ti'j ex cjawil nnimsa'ne. 16 Nim ctzalajel tu'nju nim tuj tank'ibl, ex ctzalajel ti'j ju colbilte wu'ne.
