1 Aya Nman, cjawil nnimsa'ne tu'n tcyakil wanmiye, ex cxel nma'ne cye cycyakil xjal ke tbinchbena in che bant ma'xix cyxilen. 2 Aya Nman ma'xix toclena, chin jawil sch'ine tu'n tzalajbil ti'ja; che xel nbitzane ke bitz ti'j tbiya. 3 Ke aj k'oj wi'je in che el ok twitza; in che cub tz'ak ex in che cyim. 4 Aya jwes tz'aklxix ma cub ke'ya tuj tk'ukbila tu'n ttzaj tbincha'na wi'je. 5 Ma che'x tcawina ke mastl nasyon, ma che naj tu'na ke xjal binchal mya ba'n. Ma naj cybi tu'na, tu'n mi'n cytzaj na'ntl. 6 Ma che cyim ke aj k'oj, ex cyuc'ix ke cytanmi ma che naj junx cyuc'il; tu'na ma cub t-xituna ke jlu, ex minti' jun ma cyaj ten tu'n ttzaj na'n ti'j. 7 Cucx ctel Kman te rey te jumajx; ma tcyuwsa tk'ukbil tu'n cyoc ke xjal tuj xjel tu'n. 8 Che oquel ke nasyon tuj xjel tu'n tuj tumelxix, ex cbel tk'o'n cysentens ke tnam tuj tumelxix. 9 In colin Kman cyi'j keju in che baj yajla'n; in colin cyi'j tuj tk'ijlalil yajbil cye. 10 Aya Nman, akeju ojtzki'na cyu'n, k'ukl cyc'u'j ti'ja ex minti' in che cyaj tcolina keju in che kanin onbil teya. 11 Che bitzane bitz te nimbil te Kman aju in cawin tuj tnam Sión; cyk'manxe cyuj ke tnam aju o tbincha. 12 Cucx in tzaj tna'n Dios keju in che bisun ex minti' nnic' tna'l cyok'el tu'n; ex in cub tk'o'n cycastiw keju in che yajlan cye. 13 Aya Nman, k'ak'antz tc'u'ja wi'je, que'yintza, lu kine in chin yajlanjtze cyu'n keju in che ic'un wi'je, chin tcloma te camic, 14 tu'ntzun t-xi nma'ne cye xjal ttzi tpwertil tnam Jerusalén ka aya at toclena tu'n tjaw nimsa'na, ex in chin tzalaje porque tu'na ma chin clete. 15 Ke txkantl nasyon tuj cyex cyc'obil in che cub tz'ak; ex in cyaj k'e't cykan tuj c'obil in cyaj cyk'o'n tuj ewaj. 16 Ate Kman ma txi tyec'un tib tej xcub tk'o'n cysentens ke xjal mya ba'n. Ma che cub tz'ak ke xjal mya ba'n tujx cybinchben. 17 Ke xjal mya ba'n, ex keju mya ocslal ti'j Dios, ex keju nnic' tna'l Dios cyu'n, che pol baj tuj cynajbil cyimni. 18 Mya te jumajx c'ic'el cyna'njtz ke xjal meba, ex mya te jumajx mi'n japun aju onbil in che ayon ti'j. 19 We'ctza Nman, mi'n txi tk'o'na ambil cye xjal tu'n tcub ti'ja cyu'n, k'on cuba cysentens ke txkantl nasyon. 20 Nman, tzajwit cyxobil tu'na. Tz'elwit cynic' tnam xjal ti'j ka nok elajx jun xjal ke.
