SALMOS 89

1Nman Dios, cucx chin bitzale ti'j tc'ujlalila ex cucx cxel ntx'olba'ne ka in japunxix ju tyola tu'na. 2Cxel nk'o'ne tkanil ka te jumajx ju tc'ujlalila, in japunxix ju tyola ex minti' in ch'expet; ic tza'n te cya'j minti' in ch'expet, icxtzunju tyola minti' in ch'expet. 3Cyaj bant ti'j jun tyola tuc'il David ex xi ttziyana te tmajena sc'o'maj tu'na, chiya cyja': 4Ke tiyjila che ul te tibajxi che oquel nk'o'ne te cawil te jumajx te t-xela. 5Nman Dios, cycyakil keju ate' tuj cya'j in cyk'o'n chjonte teya tu'nju in japunxix tyola, ex tu'nju tbinchbena ma'xix t-xilen. 6Mi jun anjel mi ke txkantl ate' tuj cya'j in pon ic tza'n teya Nman. 7Porque ma' t-xilena Dios, ex xobajilxixa, txolin ti'ja cyu'n keju ate' tuj cya'j. 8Nman Dios aya Tajaw Tcyakil, at nim tipumala ex tzyu'n aju yol axix toc tu'na; minti' juntl jacu pon ic tza'n teya. 9In cawina tibaj mar oc in tzaj pulin cyuw wen ex in k'ajen tu'na. 10Bi'x cub tpach'u'na ju nintz jil tuj mar, ex bi'x cub tbyo'na; ex e baj t-sputuna ke aj k'oj ti'ja tu'n tipumal tk'aba. 11Teya cya'j ex tx'otx'; tu'na o bant twitz tx'otx' ex cycyakil keju ate' twitz. 12Tu'na o bant enter twitz tx'otx', tza'nx jun pac' icx juntl pac'; ke witz Tabor ex Hermón in che bitzan tu'n tzalajbil ti'j tbiya. 13At nim tipumala ex in cub ti'j tcyakil tu'na tu'nju tipumala. 14Cyuw tten tk'ukbila porque atzun in binchet ju tz'aklxix tu'na, ex in tbincha'na tcyakil tuj tumel; in tzaj tyec'una tc'ujlalila ex aju tyola axix toc tu'n tcyakilju in tbincha'na. 15Nman Dios, at tzalajbil cye ke xjal ba'n che k'on chjonte teya ex in che bet tuj t-spic'umala, 16in che tzalaj ti'ja tcyakil k'ij ex in che tzalaj tu'nju tz'aklxixa. 17Ax toc aya k'ol kipumale tbanilxix, ex tu'n t-xtalbila cyja' toc mastl kipune. 18Ate Kman clol ke, aju Dios Xjan cye aj Israel, atzun kreyju. 19Tuj tk'ijlalil ojtxi mer ic tza'n tuj witzic' o yolina cye ke tmajena in che nimanxix teya, ex tzaj tma'na cye cyja': Cyxol ke xjal etzan wu'ne ma jaw nsc'o'ne jun minti' in baj tc'u'j, ma tz'oc nk'o'ne toclen ma'xix ex ma txi nk'o'ne onbil te. 20Ma cnet David wu'ne tu'n toc te nmajene. Ex ma jax nk'o'ne aseyt xjan tuj twi' tu'n tc'monte toclen te rey. 21Cucx chin onile ti'j ex c'oquel tipun wu'ne tu'n wipumale; 22mlay che oc tzokpaj ke aj k'oj ti'j ex mlay cub ti'j cyu'n ke binchal mya ba'n. 23Twitz che bel npach'u'ne ke aj k'oj ti'j; ex che bel nc'ixbisa'ne keju in che ic'un te. 24C'oquel nc'ujla'ne ex cjapunel nyole tuc'il; wu'ne c'oquel mas tipun. 25Cxel nk'o'ne toclen ex ctzyetelx tcawbil max ttzi Nintz mar tu'n tpon baj ttzi nima Éufrates. 26Ctzajel tma'n weye: Aya Nmane ex Ndiose, aya colol wi'je ex clol weye. 27Cxel nk'o'ne toclen ic tza'n tnejel ncy'ajale, tu'ntzun mas ma' toclen cywitz mastl rey twitz tx'otx'. 28Cucx ctel nc'ujlalile ti'j te jumajx, ex mlay ch'expet nyole cyjel bant ti'j tuc'il. 29Ke tiyjil che ul itz'j te tibajxi che cawil te jumajx te t-xel, acux atxcu cya'j. 30Katzun ma tz'el cypa'n cyib ti'j nxnak'tzbile ex ka minti' ma che bet ic tza'nx in xi nma'ne, 31ka ma che ic' tibaj nleye ex ka mi'n ma che japun ke nmandamyente cyu'n, 32cbel nk'o'ne cycastiw tu'n tlaj miban che bin ex tu'n tlaj ju mya ba'n in cybincha'n; ex che bajel npek'ane tu'n tze'; 33pero mlay baj nc'ujlalile ti'j David, ex mlay bant tu'n mi'n tjapun aju xi ntziyane te. 34Mlay cub nk'uchine aju yol cyaj bant ti'j wu'ne tuc'il, ex mlay baj nch'expu'ne aju yol o txi ntziyane te. 35Te jumajx o txi ntziyane aju yol te David, tu'nju xjan kine, ex mlay chin nic'ane yol te. 36Ke tiyjil che ul itz'j te tibajxi che oquel te cawil te jumajx te t-xel, acux cucx at k'ij. 37Cucx ctel cycawbil te jumajx ic tza'n ju xjaw, ex cucx ctel cycawbil te jumajx acux atx cya'j, chitzuna tmaya. 38Atzun ja'lo ma tz'el tic'una aju rey jaw t-sc'o'na ex ma tzaj tk'oja ti'j. 39Ma cub tk'uchina aju yol cyaj bant ti'j tu'na tuc'il tmajena; ma tz'el tic'una ex ma tz'el ti'na toclen. 40Ma cub t-xituna ju muro toc ti'j ttanmi, ex ma che cub t-xituna ke cwartel jatum in tclon tib. 41Cycyakil xjal in che ic' tuj lugar lu in xi cyelk'a'n tcyakilju at te, ex ke tvesin rey in che xmayin ti'j. 42Ma txi tk'o'na cyipumal aj k'oj tu'n tcub ti'j cyu'n, ex ma txi tk'o'na tzalajbil cye keju in che k'ojin ti'j. 43Ma baj naj ttzi t-spad tu'na ex minti' ma tz'onina ti'j tuj k'oj. 44Ma tz'el ti'na tajwalil; ma tz'el tic'una ex ma tz'el ti'na tipumal tcawbil; 45ma tijin naj tu'na, ex ma cub tk'o'na nim tch'ixwi. 46Nman Dios, ¿jtoj txi tcolina tu'n t-xi tewan tiba? ¿Cucxpe ctzajel tk'oja mer ic tza'n k'ak' in c'ant? 47Nman, na'ntza ka nok ch'in tuj wabk'iyile; ex ke xjal e bant tu'na nok ch'in in che ten twitz tx'otx'. 48Mi jun xjal cyjel ten te jumajx ex ka mi'n cyim; ex mi jun xjal jacu bant tclonte tib tu'n mi'n tcyim ex tu'n mi'n tpon tuj cynajbil cyimni. 49Nman Dios, ¿jatum ta' tc'ujlalila aju attok nej, aju xi ttziyana te David axix toc tu'n tjapun tu'na? 50Nman, na'ntza ma che el ic'un ke tmajena cyu'n nimcu xjal ex ma pon ta'w tuj wanmiye tu'nju in che oc ic'le'n. 51Nman Dios, cyja'tzun tten ma ko el ic'une cyu'n ke aj k'oj ti'ja; ex cyja'tzun tten ma tz'el ic'un ju xjal sc'o'maj tu'na ex in che xmayin ti'j tcyakil maj. 52Nimanxwit tbi Kman te jumajx. Icxwitju.

will be added

X\