1 Tbanilxix tjaya Nman Dios aya Tajaw Tcyakil. 2 Nimxix nganiye tu'n ntene twitz tjaya. Tu'n tcyakil wanmiye ex ntzalajbile in chin bitzane teju Dios itz'. 3 Ke tal chyu'j ex ke xtx'a'y in cnet cylugar tu'n toc cyk'o'n cyk'u' ti'j t-altara tu'n cyjaw pok'l cyal, Nman, aya Tajaw Tcyakil, aya Nreye ex aya Ndiose. 4 At tzalajbil cye keju najl tuj tjaya ex cucx in jaw nimsa'n tbiya cyu'n. 5 At tzalajbil cye keju in cnet cyipumal tuc'ila, ex at nim cygan tu'n cyxi' tuj tjaya. 6 Oc in che ic' tuj tzkij tx'otx', in ch'expet cyu'n ex nno'c ic tza'n jatum in che jaw jlet ke twi a', ex oc in tzaj jbal, nim a' in jaw chmet. 7 Keju xjal lu nno'cxi cyipumal junjun k'ij, ex c'oquel cyque'yin ju Dios Ma'xix T-xilen tuj tnam Sión. 8 Nman Dios, aya Tajaw Tcyakil, aya Tdios Jacob, bintza nna'j Diose. 9 Nman Dios clol keye, que'yintza tuc'il tzalajbil aju xjal sc'o'maj tu'na tu'n toc te rey. 10 Mas ba'n tu'n ntene jun k'ij tuj tjaya, twitzju tu'n ntene jun mil k'ij mya tuj tjaya; mas ba'n tu'n ntene ttzi tja Ndiose, ex mya tu'n ntene jatum najl keju binchal mya ba'n. 11 Porque ate Kman Dios spic'un ex clol ke; tzul tk'o'n xtalbil ex nimbil ke, ex mlay cub t-xc'ayin tu'n ttzaj tk'o'n aju ba'n cye keju in che bet tuj tumelxix. 12 Aya Kman Dios Tajaw Tcyakil, at tzalajbil cye ke xjal in ke' cyc'u'j ti'ja.
