SALMOS 83

1Nman Dios, mi'n cyaj tena minti' in k'ajta. Mi'n nok cub txuleya ex minti' in yolina. 2Que'yintza ke aj k'oj ti'ja ex keju in che ic'un teya; in che jaw tilj ex in jaw cyi'n cyib ti'ja. 3Tu'nju jawni cywitz, ma bant ti'j cyu'n tu'n cybinchante mya ba'n cyi'j ke xjal etzan tu'na ex cyi'j keju clo'maj tu'na. 4O cub cyximan tu'n cytzaj xitul keye, tu'n mi'n ktentle ic tza'n jun nasyon, ex tu'n mi'n ttzaj na'ntl kbiye, ako'ye aj Israel. 5O bant ti'j jun cyyol mya ba'n ti'ja, o jaw cyi'n cyib ti'ja mojl cyyol cycyakil. 6Atzun ke jlu: Ke aj Edom, ke aj Ismael cyuc'ix ke tiyjil Agar ex ke tiyjil Moab, 7ke aj Geba, ke aj Amón ex ke aj Amalec, cyuc'ix ke aj Filistey, ex ke xjal najl tuj tnam Tiro, 8ex cyuc'ixpe ke aj Asiria ma tz'oc cymojban cyib cyuc'il, tu'n cyonin cyuc'il ke cyiyjil tcy'ajal Lot. 9Binchama cyi'j ic tza'nx o tbinchaya cyi'j aj Madián, ic tza'n o tbinchaya ti'j Sísara ex ic tza'n o tbinchaya ti'j Jabín tuj tk'ab xak Sisón, 10akeju e naj tu'na tuj Endor e oc ic tza'n abono te tx'otx'. 11Binchama cyi'j ke nejenel cye ic tza'nx o tbinchaya ti'j Oreb ex ti'j Zeeb; binchama cyi'j cycyakil keju at cyoclen tu'n cycawin cyxol ic tza'nx o tbinchaya ti'j Zeba ex ti'j Zalmuna, 12akeju o cyajbe tu'n cyoc te tajwil tbanil tx'otx' etzan tu'n Dios. 13Nman Dios, k'onca ke ic tza'n tzkij ch'i'x tol t-xi' tu'n cyk'ik', ex ic tza'n t-xak tze' tzkij in xi ikan tu'n cyk'ik'; 14ex ic tza'n in tz'e'y chc'ul tu'n k'ak' ex in che baj tz'e'y ke witz tu'n tk'ak'al. 15Icxtzun yajlan cuba ke tu'n nintz cyk'ik' ex sec'pun baja ke tu'n cyk'ik' jbal. 16K'on cuba cych'ixwi ke jlu, Nman, tu'ntzun tel cynic' ti'j tipumala. 17Cubxwit cych'ixwi te jumajx; e ttzaj cych'ixwi ex e cycyim. 18E tel cynic' ti'j ka o'cx aya Mambaj, ex o'cx aya Dios Ma'xix Toclen tibaj tcyakil twitz tx'otx'.

will be added

X\