1 Che bitzane tuc'il tzalajbil te Dios aju k'ol kipumal. Cynimsa'n jawe aju Tdios Jacob, che sch'ine tuc'il tzalajbil. 2 Che bitzane tuc'il tk'ajk'ajel twi' tal tampor, tuc'ix chnab ex quitar. 3 Cyk'ajtzan oque chun oc ttzaj yec'un juntl ac'aj xjaw, ax icx oc ttijin xjaw, atzun k'ij lu tu'n tcub kic'sa'n aju nintz nink'ij. 4 Porque atzun mandamyent lu tzaj tk'o'n Tdios Jacob cye aj Israel; 5 atzun jun yol cyaj bant ti'j tu'n Dios cyuc'il tiyjil José tej tpon k'ojlel cyi'j aj Ejipt. O nbiye jun tk'ajk'ajel wibaj aju minti' ojtzki'n wu'ne, chi cyja': 6 Ma tz'el wi'ne iktz twi t-semila, ma cleta wu'ne tuj ak'untl cyuwxix. 7 Tuj yajbil teya in txquete tu'na, ex cleta wu'ne; tzaj ntzak'we'na max tuj muj in tininin wen; oc nk'o'ne tuj malbil cytzi' ke a' tuj Meriba. 8 Akeye xjal etzan keye wu'ne, cybintze aju yol cxel nma'ne cyeye; ba'nwt nxi cynimane, akeye aj Israel. 9 Mi'n tzaj cyi'ne jun cydiose tuj junxitl tnam; mi'n che c'ulune cywitz cydios ke xjal akeju minti' ojtzki'n cyu'ne. 10 Akine Cymane aju Cydiose, aju etz k'inte cyeye tuj Ejipt; cykanintze cywaye weye ex oc che nojele wu'ne. 11 Atzun ke xjal etzan wu'ne minti' inx bi'ne cyu'n; minti' inx nimane cyu'n aj Israel. 12 Cyja'tzun e cyaj nk'o'ne cucx tu'n cyten miban che bin, ex e ank'in ic tza'nx cyex cyajbil. 13 Nokwit inx bi'ne cyu'n aj Israel akeju etzan wu'ne, nokwit e bet cyuj ke nbeye, 14 juratwitlo cub cyi'j aj k'oj cyi'j wu'ne ex juratwitlo cub nk'o'ne cycastiw. 15 Keju in che ic'un ti'j Kman, juratwitlo cub cyi'j tu'n ex juratwitlo cub cycastiw te jumajx. 16 Mawtlo tz'oc tc'a'chan Dios ke xjal etzan tu'n tu'n tbanil triw, ex mawtlo tz'el txketle'n cyi'j tu'n ta'l cab te tjak' c'ul.
