SALMOS 78

1Akeye nxjalil, cybintze aju nxnak'tzbile; k'ontzxix cywi'ye ti'j aju cxel nma'ne cyeye. 2Oc chin yolile tuj techal; cxel nchic'ba'ne aju ewan atxix tuj tk'ijlalil ojtxi, 3aju o kbi ex ba'n ku'n ex o tzaj k'ma'n ke cyu'n ke ktzan kman. 4Mlay cub kewan jlu cywitz ke kc'wa'l. Cxel ktx'olba'n cye ke kiyjil che ul itz'j te tibajxi ke tbinchben Kman tbanilxix, ex aju tipumal nimxix ex ke tbinchben ma'xix cyxilen. 5Tzaj tk'o'n Dios jun ley tu'n tajben cye tiyjil, ex xi tk'o'n xnak'tzbil tu'n cyoc lpe' aj Israel ti'j, ex xi tma'n cye ke kxe'chel tu'n t-xi cyxnak'tza'n cye ke cyiyjil, 6tu'ntzun cyojtzkinte ke cyiyjil che ul itz'j te tibajxi, ex ke c'wa'l lu tu'n t-xi cyxnak'tzan cye ke cyc'wa'l che ul itz'j te tibajxi, 7tu'ntzun toc ke' cyc'u'j ti'j Dios, ex tu'n mi'n tic' tna'l cyu'n aju tbincha Dios; nok o'cx tu'n t-xi cyniman ke tmandamyent, 8ex tu'n mi'n cyoc ic tza'n ke cyxe'chel miban che niman, ex cyuw cywi', mya k'ukl cyc'u'j ti'j Dios, nok in jawje' cyc'u'j. 9Ke tiyjil Efraín banin cyten tuc'il xobl plech e je'l ok tuj k'ij tej toc k'oj; 10minti' xi cyniman aju yol otok bant ti'j cyu'n tuc'il Dios, ex minti'x xi cyniman ke t-xnak'tzbil. 11Ic' tna'l cyu'n aju otok tbincha Dios, akeju tbinchben ma'xix cyxilen otok tzaj tyec'un cye. 12Tbincha Dios ke binchben ma'xix cyxilen cywitz ke cyman tuj lugar Zoán, aju at tuj Ejipt: 13Cabe ela mar tu'n, ex e ic'tz ti'n ke tuj, cub ttzyu'n a' ex ic oc ic tza'n jun muro. 14K'ijtl e je'x t-ẍaklu'n ke tu'n jun muj, atzun te konic'an tu'n t-spic'umal tkan k'ak'. 15Cub tpa'n ke pic tuj tzkij tx'otx', ex xi tk'o'n nimxix cyc'a a'. 16Etz tilj nintz a' tuj pic tu'n Dios, ex oc ic tza'n jun nima matijxix. 17Atzun cye cucx e binchan il twitz Dios aju Ma'xix Toclen, ex jaw cyi'n cyib ti'j tuj tzkij tx'otx'. 18Oc cyk'o'n Dios tuj malbil, xi cykanin cywa ic tza'nx cyajbil. 19E yolin mya ba'n ti'j ex in cyma'ntok: ¿Jacupe tzaj tk'o'n Dios kwa tzalu tuj tzkij tx'otx'? 20Ax toc o pax pic tu'n Dios ex o tz'etz tilj a' tuj ic tza'n jun nima, pero, ¿jacupetzun tzaj tk'o'n kwa? ¿Jacupetzun tzaj tk'o'n kchi', ako' tnam etzan tu'n? Che chi, cyma. 21Tejtzun tbinte Kman jlu, tzaj tk'oj cyi'j ke tiyjil Jacob, akeju aj Israel cybi; jaw c'ant ttx'u'jil ic tza'n k'ak', 22tu'nju minti' xi cyniman tyol Dios ex minti' oc ke' cyc'u'j ti'j ju colbil tu'n. 23Masque icju, pero xi tk'o'n Dios jun orden te muj ex e jaket ke tpwertil cya'j tu'n; 24max tuj cya'j tzaj tchitun wabj maná tbi, xi tk'o'n te cywa, mer ic tza'n triw. 25Ke xjal lu xi cywa'n cywa anjel. Tu'n Dios xi k'o'n nimxix cywa. 26Tu'n tipumal Dios tzaj xupin cyk'ik' tuj tjawitz k'ij, ax icx ju cyk'ik' tuj tnayaj k'ij, 27tzaj t-sama'n Dios ke chyu'j te cychi' ke xjal etzan tu'n; akeju chyu'j tzaj t-sama'n ic cyajlal ic tza'n ttxa tz'a'n ttzi mar. 28E tzaj t-sama'n Dios jatum cycubsa'n ke xjal ex cyi'jele ke ja xbalun. 29Ex e wa'n tejxi tnoj cyc'u'j, cyja'tzun xi tk'o'n Dios aju cyajbil. 30Pero na'nxtok tnoj cyc'u'j ex atxtok cychi' tuj cytzi', 31tej ttzaj ttx'u'jil Dios cyi'j, e cub tbyo'n ke xinak mas nim cyipun. E cub tbyo'n ke xinak mas tbanil cyxol aj Israel. 32Masque bant tcyakil jlu, pero e oc ten binchal il juntl maj; minti' xi cyniman ke tbinchben Dios ma'xix cyxilen. 33Cyja'tzun cub tk'o'n Dios cycastiw tu'n cycyim te jurat naj, ex tzaj tk'o'n nim xobajil cyibaj. 34Oc in che cyim txkan tu'n Dios, atzun keju in che cyaj ank'in in che oc ten cubsal twitz Dios; in che aj meltz'aj tuc'il tu'n tcyakil cyc'u'j, 35in pontzun Dios ti'j cyc'u'j, aju Dios Ma'xix Toclen, aju in colin cyi'j ex in che clet tu'n. 36Pero nok tu'n cytzi' in xi cyma'n nimcu yol puro ba'n tbinx, pero puro nic'aj yol jlu, 37minti'x e yolin axix toc, ex minti' japun cyu'n aju yol cyaj bant ti'j tu'n Dios cyuc'il. 38Pero nimcu maj tzaj k'ak'an tc'u'j Dios cyi'j, cub tnajsa'n cybinchben mya ba'n ex minti' e naj tu'n, nimcu maj minti' tzaj tk'oj cyi'j, ex minti' xi tk'o'n ambil tu'n ttzaj ttx'u'jil. 39Tzaj tna'n Dios ka nok elaj xjal ke, ex ic cyten ic tza'n cyk'ik' in xi' ex ya minti'tl in ajtz meltz'aj. 40Nimcu maj minti' xi cyniman tyol Dios tuj tzkij tx'otx'; tu'n jlu tzaj tbis Dios cyi'j. 41Pero cucx oc cyk'o'n Dios tuj malbil; tzaj tbis Dios cyu'n, aju Dios xjan cye aj Israel. 42Minti' tzaj cyna'n aju tipumal Dios ex aju k'ij tej cyclet cywitz ke aj k'oj cyi'j. 43Tej tbinchante ke binchben ma'xix ex xobajilxix tuj lugar Zoán at tuj Ejipt, 44e oc ke nima te chic' tu'n, tu'ntzun mi'n cyc'an aj Ejipt ti'j. 45Tzaj t-sama'n ke xcatx ex ẍal cyi'j, tcyakil baj naj cyu'n; 46xi tk'o'n twitz cyawal cye ke ẍplon, aju twitz cyawal otok che ak'nan ti'j. 47Tu'n sakbakun ex tk'ab che'w e baj naj ke tkan higo ex tkan uva cye aj Ejipt. 48E cyim ke cywacẍ ex ke cyẍne'l tu'n sakbakun ex tu'n tkan k'ancyok. 49Tzaj nimxix ttx'u'jil Dios cyi'j; tzajxix tk'oj ex tzaj t-sama'n yajbil cyi'j. Tzaj t-sama'n jun c'loj anjel cyi'j tu'n cynaj. 50Tzaj nimxix ttx'u'jil cyi'j, minti' xi tk'o'n ambil tu'n cyank'in, nok o'cx tzaj tk'o'n tx'u'j yabil cyi'j tu'n cycyim; 51E cub tbyo'n cycyakil ke nej cyc'wa'l xjal aj Ejipt. 52E je'tz ti'n ke aj Israel ic tza'n jun pe'n ẍne'l; e je'x tuc'in tuj tzkij tx'otx'. 53Cheba e je'x tuc'in ke tu'ntzun mi'n cyxob, atzun ke aj k'oj cyi'j e cyaj mulk'aj tjak' mar. 54E tzaj ti'n Dios ke xjal etzan tu'n e pon ti'n tuj jun tx'otx' xjan, tuj tiwitz tx'otx' aju tu'nx el ti'n. 55Cywitzx aj Israel e ex tlajo'n Dios ke nasyon najl tuj tx'otx' lu; tuj piẍin xi t-sipan tx'otx' cyxol cycyakil c'loj aj Israel, ex atzun xi tk'o'n cye tu'n cynajan tuj. 56Atzun cye oc cyk'o'n Dios tuj malbil, aju Dios Ma'xix Toclen, jaw cyi'n cyib ti'j ex minti' xi cyniman ke tmandamyent. 57Ax o cybincha ic tza'nx o cybincha ke ktzan cyman, el cypa'n cyib ti'j Dios ex minti' japun tyol cyu'n, e oc ic tza'n jun xobl plech ẍo'c ti'j. 58Tzaj tk'oj Dios cyu'n, tu'n tlaj jaw cybincha'n ke altar cywi witz; ocx cyic'len tu'n tlaj e c'ulun cywitz ke tilbilal. 59Tzaj tk'oj Dios cyi'j tej ttil jlu, ex bi'x e jel tic'un ke aj Israel, 60ex cyaj tcolin aju ja xbalun te nabl te at tuj Silo, aju tja at cyxol xjal. 61Xi tk'o'n ambil cye aj k'oj tu'n t-xi cyi'n aju cax c'ubl tley Dios, aju techal ti'j tajwalil ex ti'j tipumal. 62Nimxix ttx'u'jil tzaj cyi'j ke xjal etzan tu'n, cyja'tzun e je'x tk'o'n tuj cyk'ab aj k'oj cyi'j tu'n cycub cyu'n. 63Tu'n k'ak' e cyim ke cu'xun at cyxol. Tu'n jlu minti' e moje' ke k'apoj. 64Tu'n spad e cyim ke pal, ex minti' xi k'o'n ambil tu'n cyjaw ok' ke cyxu'jil cyi'j. 65Atzunte Kman tzaj tna'n tib ic tza'n jun xjal nne'l twatl, ex ic tza'n jun soldad otok tz'el k'e'n tuj twi', 66ex cub cyi'j aj k'oj ti'j tu'n ex e je'l ok ke; tzaj cych'ixwi tu'n te jumajx. 67El tic'un ke tc'wa'l José, ex minti' jaw t-sc'o'n aju tiyjil Efraín; 68nok o'cx jaw t-sc'o'n aju tiyjil Judá ex tuc'ix aju witz Sión aju c'ujla'n tu'n. 69Jaw tbincha'n jun lugar xjan ma'xix twa'l ic tza'n ke witz, ex cub tcyuwsa'n te jumajx ic tza'nx tten tx'otx'. 70Jaw t-sc'o'n David tu'n toc te tmajen, aju toc te pastor ẍne'l nej; 71el ti'n tu'n mi'n tpastorintl cyi'j ke ẍne'l, tu'ntzun toc ten cwentil cye ke xjal etzan tu'n, tu'ntzun toc te pastor cye aj Israel. 72Ex atzunte David e oc tcwentin ke xjal etzan tu'n Dios; e oc tcwentin ex e je'x tuc'in ke tuc'il nabl ex tuc'il tanmi axix toc.

will be added

X\