SALMOS 77

1In jaw tk'ajk'ajel nwi'ye cyuwxix ti'j Dios tu'ntzun ntzaj bi'ne tu'n. 2Tuj k'ij oc in tzaj bis wi'je in chin cubsane twitz Kman, ex konic'an minti' in xi ncoline tu'n cyjaw nyec'une ke nk'abe twitz cya'j tu'n nna'ne Dios. Ex minti' jatum in tzaj k'ukba'n nc'u'je. 3Oc in tzaj nna'ne Dios, bi'x in chin jaw ok'e; oc in chin cub tene ximal ti'j, bi'x in tzaj baj nc'u'je. 4Nman, tu'na minti' nno'cx watl tuj nwitze, nim in baj nc'u'je ex mlay bant nyoline. 5In tzaj nna'ne ke tk'ijlalil ex ke abk'i te ojtxi; 6in tzaj nna'ne tej in chin bitzane konic'an, in chin ximane tuj wanmiye ex in chin xjeline wujxi cyja': 7¿Cucxpelo ctel tk'oj Kman ki'j te jumajx? ¿Mlaypelo ko cub t-xtalin juntl maj? 8¿Mapetzun baj aju tc'ujlalil? ¿Mapetzun baj te jumajx aju yol tzaj ttziyan? 9¿Mapetzun tzic' tna'l tu'n Dios aju t-xtalbil? ¿Masque at tk'oj, mlaypelo tzaj k'ak'an tc'u'j ki'j? 10Aju mas in chin bisune ti'j atzun jlu: Aju Dios ma' toclen mya ax tmod wuc'ile ic tza'n nej. 11Che tzajel nna'ne ke binchben ma'xix cyxilen o tbincha Kman ojtxi; 12chin ximale ti'j tcyakilju o tbinchaya, chin yolile cyi'j ke tbinchbena. 13Nman Dios, xjan teya tuj tcyakilju in tbincha'na; ¿alcye juntl nno'c cydiosin xjal ma'xix toclen ic tza'n teya? 14Dios, aya in binchante ke binchben ma'xix cyxilen. Xi tyec'una tipumala cye ke nasyon. 15Tu'n tipumala o clet aju tnam etzan tu'na, akeju tc'wa'l Jacob ex ke tc'wa'l José. 16Nman Dios, tej tque'yinjtza tu'n mar, tzaj t-xobil twitza, ex e jaw lu'lun ke a' mas ma' cyxe' tuj mar; 17tzaj ttzokpi'n muj nim jbal, o tininin k'ancyok twitz cya'j ex tuj tcyakil pac' o koptz'aje' xle'laj cya'j. 18O binjtz tk'ajk'ajel k'ancyok in tininin wen tuj xcyakinpaẍ; tuj tcyakil twitz tx'otx' o spic'banjtz tu'n xle'laj cya'j ex baj yucch tx'otx' tu'n cyaknajnab. 19Jaket jun tbeya tuj mar; ic'xa tuj nimcu a', pero mi jun oc noj ti'j tic'len tkana. 20Xi t-ẍaklu'na ke xjal etzan tu'na ic tza'n txkan ẍne'l, ex toc Moisés tuc'ix Aarón te nejenel cye.

will be added

X\