1 Ojtzki'maj Dios tuj Judá; ma'xix t-xilen tbi cyxol aj Israel. 2 Aju tja, atzun tcub twi witz Sión tuj Jerusalén; 3 atzun cub ttokin ke macbil in che ajben tuj k'oj: Ke makbil, ke spad, ke xobl plech ex cyuc'ix ke plech. 4 Nman Dios, nimxix tajwalila. Ma'xix t-xilena cywitz ke witz minti' bajsbil cye. 5 Keju mas cyuw cyc'u'j tuj k'oj, el k'i'n tcyakilju at cye. Keju mas nim cyipun, misicyer jun o bant cyu'n; nok o'cx e ic' tan ke ex bi'x e cyim. 6 Ex minti'lpe bant cyyucch ke carwaj ex ke chej tej cyoc t-xobtza'na, aya Tdios Jacob. 7 Puro xobajilxixa. ¿Alcye jun jacu cub we' twitza oc ttzaj ttx'u'jila? 8 Max tuj cya'j tzaj tyec'una aju sentens tzaj tk'o'na; tzaj t-xobil ti'j tx'otx' ex nok cub txule' 9 tej tjaw we'ya Nman Dios tu'n tcub tk'o'na cysentens ke xjal, ex tu'n cyclet cycyakil keju in che baj yajla'n tzalu twitz tx'otx'. 10 Aju cyk'oj xjal in tzaj, cch'expetel tu'na tu'n tajben te nimbil teya; ex atzun mastl cyk'oj xjal cmayetel tu'na. 11 Cytziyanxe jun yol te Kman aju Cydiose, ex japunx cyu'ne. Akeye xjal ate' cyuj ke nasyon ate' cyi'jele aj Israel, cyi'ntze ke oyaj twitz Dios aju ba'n tu'n kxob twitz. 12 Porque in naj cyipumal ke cawil tu'n ex in tzaj cyxobil ke rey tu'n, akeju ate' twitz tx'otx'.
