SALMOS 74

1Nman Dios, ¿tiku'n ma ko cyaj tcolina te jumajx? ¿Tiku'n ma tzaj ttx'u'jila ki'je ako'ye t-ẍne'la ato'ye tuj tpe'na? 2Na'ntza ko'ye, ako'ye jun tnam etzan tu'na, aju cnet tu'na atxix ojtxi, aju o colpet tu'na tu'n toc te jun tnam etzan tu'na; na'ntza aju witz Sión jatum o najana. 3Tzaja que'yilte cye ke ja te jumajx ma che cub xitj; ma baj cyxitun aj k'oj tcyakil aju at tuj lugar xjan teya. 4Ke aj k'oj ti'ja in che sch'in tuj tjaya. Ma cub cyk'o'n ke cybander te jun techal tu'nju ma che camban. 5Mer ic tza'n tx'emil si' ke tuj tmijil jun chc'ul pin tze' tuj, 6tu'n si'wbil c'uxbil ex tu'n martiy el cypa'n ke tilbilal c'ochimaj twitz ja. 7Oc cykoptz'in k'ak' ti'j tjaya jatum najliya, ex baj cytz'ilsa'n ex cub cyxitun. 8Cub cyximan tu'n kcub baje cyu'n; baj cypatun cycyakil lugar jatum in cub kchmon kibe tu'n kc'ulune teya. 9Minti'tl in kile ke techal xjan ke, minti'tl jun t-sanjela atx ex minti'lpe ba'n ku'ne jtoj baj jlu. 10Nman Dios, ¿jtoj tu'n t-xi cycolin aj k'oj tu'n cyyolin mya ba'n ki'je? ¿Cucxpe che oquel ten aj k'oj xmayil ti'ja? 11¿Tiku'n minti'tl in ko tzaj tonina? ¿Tiku'n in che cub ttz'ulina ke tk'aba? 12Atxix tuj tk'ijlalil ojtxi aya nreye. Nman Dios, nimcu maj o ko clete tu'na; 13tu'n tipumala cub tpa'n tib mar, cub tpa'na cywi' ke nintz txcup ate' tuj mar, 14cub tpach'u'na ke twi' ju nintz txcup Leviatán tbi, ex xi tk'o'na te cychi' ke txcup ate' tuj lugar minti' cynajbil xjal tuj. 15Tu'na jaket cywi a' ex ke nima, ex e aj tzkij ke nima akeju bajx che aj tzkij. 16Teya ju k'ij ex konic'an; tu'na o bant xjaw ex k'ij; 17tu'na cub tk'o'na techal jatum ponin baj tx'otx'; tu'na bant tk'ijlalil coresma ex tk'ijlalil jbalil. 18K'o'nc tcwenta ti'j Nman, in ic'un aj k'oj ti'ja ex aju xjal minti' tnabl in yolin mya ba'n ti'ja. 19Mi'n tzic' kna'njtze tu'na. Minti' kipune. Ic ktene ic tza'n ke ẍpo'k; mi'n ko'x tk'o'na cye ke txcup te tjak' c'ul. 20Na'ntza aju yol o cyaj bant ti'j tu'na, porque nojni tuj tcyakil twitz tx'otx' tu'n c'ixbisabl. 21Mi'n tak'a ambil tu'n tcub cych'ixwi ke xjal in che baj yajla'n; cjawil nimsa'na cyu'n ke xjal meba ex ke mans. 22Nman Dios, we'ctza ex clom tiba. Na'ntza, minti' in xi cycolin xjal minti' cynabl tu'n toc ic'le'na cyu'n. 23Mi'n tzic' tna'l tu'na aju tk'ajk'ajel cywi' aj k'oj ti'ja in che sch'in, tuc'ix tk'ajk'ajel nimxix cyu'n keju in jaw cyi'n cyib ti'ja.

will be added

X\