SALMOS 73

1Ba'nte Dios cyuc'il aj Israel, cyuc'il keju sak tuj cyanmi. 2Ch'ixmi ẍin jaw tolje, ex ch'ixmi ẍex jilj ke nkane, 3porque ma tzaj tlo'ch nc'u'je tej ẍe oc nque'yine puro tuj txubtxaj ate' keju in jaw cyniman cyib ex keju mya nimal Dios. 4Minti' in che c'ixbisanjtz, ba'n ta' cyximlal; 5minti' in tzaj yajbil cyi'j, ex minti' in tzaj jun c'ixc'oj cyi'j, ic tza'n cye txkantl xjal. 6Aju cynimbil cyib toc cyu'n ic tza'n jun cyu', ex aju c'ixbisabl cyu'n cyi'j xjal toc cyu'n ic tza'n cyxbalun; 7nim mya ba'n in tzaj jlet tuj cyanmi ex nim cyximbetz mya ba'n. 8In che xmayin ex in che yolin mya ba'n, in jaw cyniman cyib ex in baj cyyolin ti'j tu'n cyc'ixbiset xjal cyu'n; 9in che yolin mya ba'n ti'j Dios at tuj cya'j, ex cyaj tu'n cymandarin cyi'j cycyakil xjal twitz tx'otx'. 10Cyja'tzun in che oc lpe' xjal cyi'j ex jurat in xi cyniman xjal aju yol in tzaj cyma'n. 11In cyma'n: ¿Baka jacu tbi Dios? ¿Baka jacu tz'el tnic' Dios ti'j, aju Dios at tuj cya'j? 12Cyja'tzun cyten keju binchal mya ba'n. Minti' in cyc'ulba'n jun mya ba'n ex cucx in chmet cyk'inumbal. 13Nokx gan nno'c tilil wu'ne tu'n tten wanmiye sak ex minti' in tzaj ntzyu'ne jun ti'xti mya ba'n. 14Tuj enter k'ij in chin c'ixbisanjtze tu'na, ex tcyakil prim in cub tk'o'na ncastiwoye. 15Nokwit ma cub nximane ic tza'n cye xjal lu, mawtlo che cub nsbu'ne ke tc'wa'la. 16Oc tilil wu'ne tu'n tel nnic'e ti'j jlu, pero cyuw ela te weye. 17Max el nnic'e ti'j alcye cbajel cyi'j tejxi wocxe tuj tja Dios. 18Ma che cub tk'o'na tuj jun be puro jilin ex in che'x tlamo'na tu'n cynaj. 19Jurat naj in che naj tu'na, ex tu'nx cyxobil in che cyim ex in che naj. 20Ic cyten xjal lu ic tza'n jun witzic' oc tel kwatl, cyja'tzun Nman, oc tjaw we'ya, che elel tic'una porque mer ic tza'n nok jun tilbilal ke. 21Tzaj nim tlo'ch nc'u'je ex tzaj jun ta'w tuj wanmiye 22tu'nju minti' nnable ex minti' el nnic'e ti'j; mer ic kine twitza ic tza'n jun txcup. 23Masque icju, pero cucx ma chin tene tuc'ila ex tzyu'n kine tu'n tbank'aba. 24Ẍaklu'n kine tu'na ex tzaj tk'o'na nnable, te bajsbil oc chin c'metela tu'na tuj tajwalila. 25¿Alcye ẍaklul weye at tuj cya'j? O'cx aya. Ex oc ntene tuc'ila minti'tl waje ti'j ju at twitz tx'otx'. 26In baj tipun nximlale ex wanmiye, pero a Dios k'olte tipumal wanmiye ex ate wetzbile te jumajx. 27Keju nne'l cypa'n cyib ti'ja che cymel; ex keju in cyaj cycolin cyocslabl ti'ja, che najel tu'na. 28Atzun weye chin xel lak'e'ye ttxlaj Dios, porque atzun mas ba'n te weye. Nman Dios, aya colol weye ex cxel nchic'ba'ne tcyakil tbinchbena.

will be added

X\