SALMOS 72

1Nman Dios, k'ontza tnabl rey tu'n tcawin tuj tumelxix, ex tz'ocwit te tz'aklxix tu'na. 2Tuj tumelxix ccawil cyibaj ke xjal etzan tu'na ex tuj tumelxix cxel tbincha'n cyi'j ke xjal in che yajlanjtz. 3Tuj tumelxix ccawil ju rey cyibaj xjal tu'ntzun cyten tuj txubtxaj ke xjal etzan tu'na. 4Tuj tumelxix cxel tbincha'n rey cyi'j ke meba, ex che cletel tu'n ke xjal minti' at cye, ex bi'x che najel tu'n ke xjal in che yajlan. 5Oc che nimal xjal teya te jumajx, acux atxcu k'ij ex xjaw. 6Ic c'oquel ju rey ic tza'n jbal ex ic tza'n ttxa che'w in baj ta'lin ju tx'otx' ex ju lugar jatum in che wa'n alumaj. 7Che tel xjal tuj txubtxaj ex che betel tuj tumelxix tuj tk'ijlalil tcawbil, ocxi tnaj xjaw. 8Cbel ti'j tcyakil tu'n, ex ctzajel ke' tcawbil ttzi' jun mar tu'n tpon baj ttzi' juntl mar, ex ctzajel ke' ttzi nima Éufrates tu'n tpon baj max ttxa'npun tx'otx'. 9Ke xjal najl tuj tzkij tx'otx' che bel ẍmeje' twitz, ex ke aj k'oj ti'j c'oquex cyk'on cyib tjak' tcawbil. 10Tzul k'i'n oyaj te ex chojbil cyu'n ke rey te tnam Tarsis, ex cyu'n ke rey najl ttzi mar, ax icx cyu'n ke rey tuj tx'otx' Sabá ex tuj tx'otx' Seba. 11Cycyakil rey che bel ẍmeje' twitz ex cycyakil xjal cyuj ke nasyon che ajbel te. 12Porque a ccolol cyi'j ke meba in che cubsan twitz ex cyi'j keju in che yajlanjtz ex minti' jun onil cye. 13Ctzajel tz'e'y tc'u'j cyi'j ke xjal mans, ex che cletel ke xjal meba tu'n. 14Che cletel tu'n tuj cyk'ab keju in che yajlan cye ex tuj cyk'ab ke byol xjal, porque ma' t-xilen cychwinklal tuj twitz. 15C'elel tk'ij rey ex ctzajel k'o'n te aju k'an pwak in tzaj tuj tx'otx' Sabá. Cucx che cubsal xjal twitz Dios ti'j rey ex cucx cxel cyk'o'n xjal chjonte te. 16Cchmetel nim twitz triw tuj tx'otx' lu ex ctzajel ch'iy nimxix tuj tiwitz tx'otx'. Ic c'oquel twitz ic tza'n ke tze' twi witz Líbano, ex che chmetel nim xjal tuj tnam ic tza'n c'ul in pok'chaj tuj cojbil. 17Cucx cyjel ten tbi rey te jumajx ex cucx che yolil xjal ba'n ti'j acux atx k'ij twitz cya'j. Cycyakil xjal cyuj ke nasyon twitz tx'otx' oc cyc'ma' cy'iwbil nok tu'n. Cycyakil xjal cyuj ke nasyon twitz tx'otx' oc cyma': At tzalajbil te. 18Kk'onx chjonte te Kman Dios aju Cydios aj Israel, porque o'cx a binchalte ke binchben ma' cyxilen. 19Nimanxwit te jumajx aju tbi ma' t-xilen, ex nojxwit tcyakil twitz tx'otx' tu'n tajwalil. Icxwitju. 20Atzun in pon baj ke tna'j Dios David, aju tc'wa'l Isaí.

will be added

X\