1 Nman, ti'ja ma tz'oc nclon wibe; mi'n tak'a ambil tu'n tcub nch'ixwiye. 2 Chin tonintza ex chin tcloma porque aya tz'aklxix. Chin tbintza ex chin tcloma. 3 Tz'ocwita te weye ic tza'n jun pic tu'n toc nclon wibe ti'j; tz'ocxwita te jun lugar cyuw tten te colbil wibe ex colol weye. Aya ic ttena te weye ic tza'n jun pic ex jun lugar cyuw tten. 4 Nman Dios, chin tcloma tuj tk'ab ju xjal mya ba'n, tuj tk'ab ju byol xjal ex tuj tk'ab aju jawni twitz tu'n tk'ojin, 5 porque ti'ja Nman Dios in chin ayone, ex ti'ja k'ukl nc'u'je atxix tuj ncu'xumale. 6 Tej atinxtoke tuj talbil ntxu'ye otok tz'oc ke' nc'u'je ti'ja. Tu'na in ul itz'je. Cucx cjawil nnimsa'ne. 7 Ma che jaw labin nimcu xjal wi'je, pero aya colbil weye. 8 Tcyakil k'ij in chin yoline ti'j tajwalila ex in jaw nnimsa'ne tbiya; 9 mi'n chin el tic'una oc ntijine; mi'n chin cyaj tcolina oc minti'tl wipune. 10 Ke aj k'oj wi'je cyaj tu'n ncub cybyo'n, ma tz'oc cyjunin cyib ex in baj cyximan tu'n cybinchante mya ba'n wi'je. 11 In cyma'n cyja': Che lpexe ti'j ex cytzyuntze, ma cyaj colin tu'n Dios ex mi a'l jun jacu clonte te. 12 Mi'n tz'el lak'e'ya wi'je Nman Dios; tzaj naja onil weye. 13 Tzajxwit cych'ixwi ex che najxwit ke aj k'oj wi'je. Tzpet-xwit cynabl ex tz'elxwit cych'ixwi keju cyajbil tu'n ttzaj mya ba'n wi'je. 14 Atzun weye cucx chin ayole ti'ja, ex cucx cjawil nnimsa'na; 15 tcyakil k'ij cxel nchic'ba'ne aju ttena tz'aklxix ex aju colbil tu'na. Ma'xixte jlu, mlay tz'el nnic'e ti'j. 16 Chin oquel tene k'malte ke binchben nim cyipumal o che bant tu'na Nman; cxel nma'ne ka o'cxcu aya tz'aklxix. 17 Nman Dios, aya o tzaj xnak'tzante weye atxix tuj ncu'xumale, ex cucx in chin yoline cyi'j ke tbinchbena ma'xix. 18 Nman Dios, mi'n chin cyaj tcolina oc ntijine ex oc t-sakix nwi'ye, tu'ntzun nyoline ti'j ju tipumala ma'xix cye ke xjal ate' ja'lo ex cye keju che ul itz'j te tibajxi. 19 Nman Dios, aju ttena tz'aklxix japun pon max twitz cya'j; tu'na o che bant ke ti'xti ma'xix cyxilen; mi a'l juntl ic tza'n teya. 20 Masque ma tak'a ambil tu'n twile nimcu mya ba'n ex bis, pero chin ank'ile tu'na juntl maj; chin cjawitz ti'na max t-xe'pun tx'otx', 21 ctzajel tk'o'na mastl woclene ex ctzajel tk'ukba'na nc'u'je juntl maj. 22 Nman Dios, che xel nbitzane ke bitz ex cjawil nnimsa'ne tbiya tuc'il tk'ajk'ajel twi chnab arpa ex quitar, tu'nju in japun tu'na tcyakilju in tzaj ttziyana, aya Xjan cye aj Israel. 23 Chin tzalajele oc cyxi nbitzane ke bitz teya, ax icx ctzalajel wanmiye aju ma clet tu'na. 24 Ax icx cxel nma'ne tcyakil k'ij ka aya puro tz'aklxix, porque ma cub cych'ixwi keju cyaj tu'n ttzaj mya ba'n wi'je.
