SALMOS 7

1Nman Dios, ti'ja k'ukl nc'u'je; chin tcloma cywitz cycyakil keju in che yajlante weye. 2Porque ic cyten ke jlu ic tza'n ke balun; mya yajcu chin baj paẍu'ne cyu'n ex mi a'l jun jacu tzaj colol wi'je. 3Aya Nman Dios, ¿alcyetzun o nbinchaye cyxol ke jlu? ¿Atpetzun jun mya ba'n o nbinchaye? 4¿Opetzun nbinchaye mya ba'n ti'j jun wamiwoye te t-xel ba'n otok tbincha weye? Nok o'cx o clet wu'ne aju xjal nokx gan oc tk'on tib te aj k'oj wi'je. 5Nokwit o nbinchaye ke jlu, tuj tumelxwitlo ta' tu'n cyoc lpe' ke aj k'oj wi'je tu'n ntzyete cyu'n, ex tu'n ncub cyxo'n twitz tx'otx', ex tu'n nbaj wabane cyu'n tuj kuk. 6We'ctza tuc'il tk'oja Nman. We'cuya cywitz ke aj k'oj wi'je in che k'ojl wen. Ttzaja Nman, binchantza wi'je ic tza'n banimaj tu'na. 7E toc cychmon cyib cycyakil nasyon twitza, ex atzun k'on cuba tk'ukbila tu'n tcawina cyibaj. 8Aya Nman, tu'na in che oc ke nasyon tuj xjel ti'j cybinchben; binchantza wi'je ic tza'nx ntene tz'aklxix kine ex minti' wile. 9Aya Dios tz'aklxix, in baj tque'yina ke ximbetz ex aju in cyna'n xjal tuj cyanmi, k'manxa cye xjal mya ba'n tu'n mi'n cybinchantl il, atzunte xjal ba'n tmod cucx tenc tu'na wa'lxix. 10Aju colol weye ate Dios aju ma'xix toclen, aju in che clet ke xjal ba'n cymod tu'n. 11Ate Dios jwes tz'aklxix, tcyakil maj at tk'oj cyi'j ke xjal mya ba'n. 12Katzun mi'n ma tz'ajtz ti'j tanmi xjal, cjawil tjaku'n Dios ttzi t-spad; ma tz'el t-xkinin tak'al xobl tplech, 13ma bant tten tu'n cyxi t-xo'n ke tplech in che c'ant tu'n k'ak', ex ma bant cyten ke tmacbil in che ajben tuj k'oj, akeju in che cyim xjal cyu'n. 14Cyque'yinxe aju xjal mya ba'n; in cub ten ximal ti'j tuj tanmi tu'n tbinchante mya ba'n, ex tujx tanmi in jatz jlet nic'aj yol. 15Ma baj tbincha'n jun jul matij t-xe' ex tujx jul lu cxel tz'ak. 16Aju mya ba'n in tbincha'n xjal ex aju ttx'u'jil, tibajx che bel tz'ak ke jlu. 17Cjawil nnimsa'ne Kman tu'nju tz'aklxixte; che xel nbitzane ke bitz ti'j tbi Kman aju ma'xix toclen.

will be added

X\