SALMOS 68

1Oc in jaw we' Dios cyi'j ke aj k'oj ti'j, bi'x in che el sputj tu'n; ex keju in che ic'un te bi'x in che el ok twitz; 2in che cub naj ke ic tza'n sib tuj cyk'ik', in che el a'yix ke ic tza'n xcab nno'cx k'ot tuj k'ak'; cyja'tzun tten in che naj ke xjal mya ba'n twitz Dios. 3Atzun cye keju tz'aklxix in che tzalaj ke; in che noj tu'n tzalajbil twitz Dios ex in che t'icpaj tu'n tzalajbil. 4Che bitzane te Dios, che bitzane tu'n tjaw nimset tbi; cynimsa'n jawe aju in bet tibaj muj. Che tzalajxe ti'j Kman. Che tzalajxe twitz. 5Ate Dios najl tuj tja xjan, ate mambaj cye ke c'wa'l minti' cyman ex cytxu' ex colol cyi'j ke meba xu'j; 6In tzaj tk'o'n Dios jun lugar jatum tu'n cynajan keju cyjunalx ate'; in che etz ttzokpi'n keju cyocx pres ex in xi tk'o'n tzalajbil cye; atzun cye keju miban che bin oc che najal tuj tx'otx' miban tzaj awal tuj. 7Nman Dios, tej tcub neja cywitz ke xjal etzan tu'na ex tej tbeta tuj lugar minti' cynajbil xjal tuj, 8jaw lu'lun tx'otx', tzaj jbal twitz cya'j, aju witz Sinaí jaw lu'lun twitz Dios, aju Dios cye aj Israel. 9Nman Dios, tu'na tzaj nimxix jbal tu'ntzun toc juntl maj tipun aju tzkij tx'otx' etzan tu'na. 10Ke xjal etzan tu'na axtzun e cub ten tuj, atzun teya Nman Dios, nok tu'n t-xtalbila xi tk'o'na cye ke meba aju at tajben cye. 11Tzaj tk'o'n Kman jun tnej yol ex nimcu xu'j e oc ten k'malte tkanil: 12E je'l ok ke rey cyuc'ix ke cysoldad. Ke xu'j otok che cyaj ten ja baj cysipan aju otok tz'el k'i'n cye aj k'oj, 13atzun cyeye acux coẍl keye tuj cype'n ẍne'l, oc ttx'otx'il sak pwak cyi'j ke t-xic' paloma. Ex oc ttx'otx'il k'an pwak mas tbanil cyi'j ke ttzmal. 14Tejtzun cyel ok ke rey tu'n Dios aju Tajaw Tcyakil, sak oc twi witz Salmón tu'n. 15Ma' cywa'l ke witz tuj tx'otx', ex ma'xix cyjawsa'n. 16Akeye witz ma' cywa'le, ¿tiku'n in tzaj tlo'ch cyc'u'je ti'j ju witz jaw t-sc'o'n Dios tu'n tnajan twi'? Atzun cnajal Kman te jumajx. 17Tuj milin ate' ke tcarwaj Dios te k'ojbil; tzaj twi' witz Sinaí cyuc'ix ke tcarwaj ex ul tuj tja. 18Nman Dios, ma jaxa twi' jun witz ma' twa'l, ma che jax ti'na ke pres; o tc'ama chojbil tzaj cyk'o'n xjal, ex cyuc'ixpe ke xjal miban che niman tzaj cyk'o'n chojbil teya Nman, tu'ntzun tnajana cyxol. 19Nimanxwit Kman aju Kdios ex clol ke, tu'nju teyle junjun k'ij in xi ti'n aju kikatz. 20Ate Kman Dios ba'n colin, ex jacu ko clet tu'n te camic, 21cbel tpa'n Dios cywi' aj k'oj ti'j, tuc'ix cywi' keju cucx cybinchan il. 22O tma Kman cyja': Oc c'ajetz wi'ne tuj tx'otx' Basán; oc c'ajetz wi'ne tuj mar ma' t-xe', 23tu'ntzun tnoj cyi'j tkana tu'n cychc'el ke aj k'oj ti'ja ex tu'n t-xi cyc'a'n ke ttx'ya'na. 24Nman Dios, aya Ndiose ex Nreye, tuj tjaya xjan k'ancha'l ke xjal txolin cyten in cub cyic'sa'n nink'ij te nimbil teya. 25Nejni ke bitzal ex lepchix ke k'ajtzal chnab, ex tuj xolbaj cycu'x ke tal k'apoj nno'c cyk'ajtza'n ke tampor ch'in. 26Cyk'onxe chjonte cycyakile te Kman Dios. Cyk'onxe chjonte te cycyakile akeye aj Israel. 27Nejni Benjamín cywitz, aju mas ch'in, cyuc'ix nimcu nejenel cye tiyjil Judá, cye tiyjil Zabulón ex cye tiyjil Neftalí. 28Nman Dios, yec'untza tipumala ic tza'n o tbinchaya ki'je ojtxi. 29Max tuj tjaya ma' twa'l tuj Jerusalén, jatum in pon k'i'n oyaj teya cyu'n ke rey, 30cawinxa tnam Ejipt, aju ic tten ic tza'n ke txcup ate' tjak' tkan ajlaj, ex ic tza'n ke tor ex ke tal tor tx'u'j ke, e tcub cymansin cyib twitza ex e ttzaj cyi'n sak pwak; sputun ela ke xjal o'cx cyaj ti'j k'oj. 31Tuj Ejipt che tzajel ke nejenel; cjawil cyyec'un cyk'ab aj Etiopía twitz cya'j tu'n cyna'n Dios. 32Che bitzane te Dios akeye tnam tuj tcyakil twitz tx'otx', cybitzanxe bitz te Kman, 33aju in bet twitz cya'j, aju cya'j at te jumajx. Cybinxe tk'ajk'ajel twi', aju tk'ajk'ajel twi' nimxix tipumal. 34Tz'elx cynic'e ti'j tipumal Dios; aju tajwalil tcub cyibaj aj Israel, aju tipumal in japun canun twitz cya'j. 35Ma'xix t-xilen Dios tuj tja xjan; aju Cydios aj Israel in tzaj tk'o'n cyipumal ke xjal etzan tu'n. Nimanxwit tbi Dios.

will be added

X\