SALMOS 66

1Che bitzane te Dios tuc'il tzalajbil akeye najl tuj tcyakil twitz tx'otx'; 2che bitzane tu'n tjaw cynimsa'ne tbi tbanilxix; cyk'onxe chjonte te ex cynimsa'n jawe tbi. 3Cymanxe te Dios cyja': Ma'xix cyxilen ke tbinchbena. Nok tu'n tipumala ma'xix che bel tz'ak twitza ke aj k'oj ti'ja. 4Cycyakil xjal che bel ẍmeje' c'ulul twitza, ex che bitzal tu'n tjaw nimsa'n tbiya. 5Cytzaje que'yilte aju tak'unben Dios, akeju binchben ma'xix cyxilen o tbincha cyi'j ke xjal: 6Aj tzkij mar tu'n, ax icx e jic'x ke kxe'chel tuj nima Jordán tu'n cykan; ko tzalajxix ti'j Dios. 7In cawin te jumajx tuc'il tipumal; toc tcwent cyi'j ke nasyon tu'ntzun mi'n tjaw cyi'n cyib cyi'j keju miban che bin. 8Cycyakile akeye txkantl nasyon cyk'onxe chjonte te Kdiose, che bitzane tu'n tjaw nimset tbi. 9Porque nok tu'n cucx itz'x ko'; ex tu'n minti' ma ko jaw tz'ak. 10Kman Dios, ma ko oc tk'o'na tuj malbil, ma ko baj t-saksa'na ic tza'n sak pwak. 11Ma ko tzyete tu'na tuj c'obil; ex ma cub tk'o'na jun iktz alxix kibaje. 12Xi tk'o'na ambil tu'n tcub ki'je cyu'n aj k'oj; mer ic tza'n ma ko ic'e tuj a' ex tuj k'ak', pero te bajsbil ul ti'na ko'ye tuj jun lugar tbanilxix. 13Oc chin oquexe tuj tjaya ex che bel npatune ke oyaj twitza; cyja'tzun cjapunel wu'ne aju yol o txi ntziyane, 14aju yol xi ntziyane teya tej atintoke tuj xobajil. 15Che bel npatune tibaj t-altara ke alumaj ulni cynabl; ex che xel nk'o'ne teya ke tor ex ke tman chip tuc'ix t-sibel ẍne'l. 16Cytzaje cycyakile akeye in che xob twitz Dios. Cybintze, cxel nma'ne cyeye aju ma tbincha weye. 17Jaw tk'ajk'ajel nwi'ye tu'n ncubsane twitz, ex jaw nnimsa'ne tbi. 18Nokwit at nximbetze mya ba'n, minti'wtlo ma chin tzaj bi'ne tu'n Kman; 19pero ma chinx bi'ne tu'n ex ma tzaj tbi'n nna'j Diose. 20Nimanxwit te Dios, minti' ma tz'el tic'un nna'j Diose ex minti' ma cub t-xc'a'yin tc'ujlalil weye.

will be added

X\