1 Kman Dios, ba'n tu'n t-xi kk'o'ne chjonte teya tuj tnam Sión ex tu'n tjapun ku'ne aju o txi ktziyane teya, 2 porque in tbi'na aju kna'j Diose. Cycyakil xjal in che ul tuc'ila. 3 In cub ki'je tu'nju kbinchbene mya ba'n, pero in cub tnajsa'na kile. 4 At nim tzalajbil teju xjal in jaw t-sc'o'na ex in pon ti'na tuc'ila tu'n tten nikayin ttxlaja, ex tu'n tten tuj tjaya. Ko tzalajele tu'n tcyakilju ba'n at tuj tjaya, aju tjaya xjan. 5 Kman Dios aju clol keye, in ko tzaj ttzak'we'na tu'nju tbinchbena ma'xix t-xilen ex tz'aklxix; cycyakil xjal twitz tx'otx' in ke' cyc'u'j ti'ja, ax icx keju najl jlajxi mar. 6 Tu'n tipumala tzyu'n ke nmak witz tu'n mi cyyucch. 7 Tu'na in k'ajen tk'ajk'ajel mar oc ttzaj pulin, ex tu'na in che mayet ke xjal oc cyjaw tilj ti'j jun yol; 8 ax icx ke xjal najl tuj tx'otx' najchak in tzaj tchi cyi'j tu'nju tbinchbena ma'xix t-xilen; in che sch'in xjal tu'n tzalajbil ti'ja tuj jun pac' ttxa'n tx'otx' ax icx tuj juntl pac'. 9 Cwentin ju tx'otx' tu'na, ex in tzaj tk'o'na jbal tibaj tu'ntzun mejor ttzaj ch'iy awal tuj; tu'na in che ch'iy ke tk'ab xak tu'ntzun tch'iy twitz awal. Cyja'tzun tten in baj tbincha'na ju tx'otx'. 10 Tu'na in baj ta'lina aju tx'otx' ch'oquimaj, ex tu'na in noj cyxol ke surc tu'n a'; tu'n jbal in tzaj tk'o'na in k'uynix tx'otx' ex in cub tcy'iwla'na tu'ntzun ttzaj tk'o'n twitz awal. 11 In tzaj tk'o'na t-xtalbila tuj enter abk'i, ex nok jatum in beta, atzun in chmet nim twitz awal. 12 Ma ch'iy nim cha'x c'ul tuj tzkij tx'otx' ex puro mejor in che cyaj ke witz, mer ic tza'n otok tz'oc jun cyxbalun ac'aj. 13 In noj tuj chk'ajlaj cyu'n alumaj, ke tx'otx' ttzi a' nojni twitz tu'n triw; cycyakil in che bitzan ex in che sch'in tu'n tzalajbil.
