SALMOS 60

1Nman Dios, tu'n tk'oja ma ko cyaj tcolina, ma cub ki'je tu'na; k'ontza kipune juntl maj. 2O tzaj lu'lun tx'otx' tu'na ex o tz'el c'abchaj; jpun oca juntl maj ke tpa'xil, porque niban tbaj xitj. 3Aju tnam etzan tu'na ma tz'oc tk'o'na tuj malbil cyuwxix, mer ic tza'n vin ma tzaj tk'o'na keye ex ma ko pich'jeye tu'n; 4ja'lo k'onxa jun techal cye keju in che niman teya, tu'ntzun cycolpaj cye ke plech in che tzaj xo'n. 5Ko ttzak'wentza, ex ko tcloma tu'n tipumala. Colina cyi'j keju in che tc'ujla'na. 6O tzaj tma'n Dios tuj tja xjan cyja': Tuc'il tzalajbil cbajel npa'ne tuj piẍun aju tx'otx' Siquem, ex cbajel npa'ne ju chk'ajlaj Sucot. 7Aju tx'otx' Galaad ex ju tx'otx' Manasés weye ke; ate Efraín ic tten te weye ic tza'n jun pasbil c'uxbil tjax tuj nwi'ye; ate Judá ic tten te weye ic tza'n nvare tu'n ncawine; 8ate Moab ic tten te weye ic tza'n jun palangán jatum tu'n tel ntx'jo'ne nk'abe; ex tibaj ju tx'otx' Edom cxel nxo'ne nxajbiye te jun techal ka otok tz'oc te weye; chin jawil sch'ine tu'nju otok chin cambane cyi'j aj Filistey. 9¿Alcye cxel k'inte weye tuj tnam toc muro ti'j? ¿Alcye cxel ẍaklunte weye tu'n npone max tuj Edom? 10Nman Dios, ma ko el tic'una; minti'tl nne'tza cyuc'il ke ksoldadiye. 11Ko tonintza tu'n tcub cyi'j ke aj k'oj ki'je, porque minti'x tajben aju onbil cyu'n xjal. 12Nok tu'nju onbil tu'n Dios oc ko cambal; ex tu'n cbel cyi'j ke aj k'oj ku'n.

will be added

X\