SALMOS 59

1Nman Dios, chin tcloma tuj cyk'ab aj k'oj wi'je; chin clet-xwita tu'na tuj cyk'ab keju in jaw cyi'n cyib wi'je. 2Chin tcloma tuj cyk'ab xjal binchal mya ba'n, chin tcloma tuj cyk'ab ke byol xjal, 3porque at ke xjal nimxix cyipumal nok in che ayon ti'j tu'n ncub cybyo'n. 4Nman, bajx jaw wi'n wibe cyi'j ex bajx chin binchane il; minti' o bant jun mya ba'n wu'ne cyi'j, ex masque icju, pero nno'c tilil cyu'n tu'n cyoc tzokpaj wi'je. K'i'mel twatla. Tzaja onil weye ex que'yinxa aju in bant cyu'n. 5Aya Nman Dios aju Dios Tajaw Tcyakil, aju Dios cye aj Israel, k'i'mel twatla, ex k'on cuba cycastiw ke xjal mya ocslal ke ti'ja; mi'n tzaj tz'e'y tc'u'ja cyi'j ke binchal mya ba'n, akeju in che oc meltz'aj wi'je. 6Konic'an in che ajtz meltz'aj, in che kawin ic tza'n ke tx'yan, ex nok in che betje' tuj tnam. 7Nim in che yasun ex in che xobtzan, aju cytzi' mer ic tza'n spad in che naj xjal tu'n, ex in cyma'n: Mi a'l jun in bin ki'j, che chi. 8Atzun teya Nman in tze'na cyi'j; in xmayina cyi'j keju mya ocslal ke ti'ja. 9Tuc'ila in nclon wibe Nman Dios, porque aya k'olte wipumale ex aya colol wi'je. 10Aju Dios in c'ujlante weye tzul onil weye; cwila'ye oc tcub cyi'j ke aj k'oj wi'je tu'n. 11Mi'n che cub tbyo'n naja ke, tu'ntzun mi'n tic' tna'njtz cyu'n ke ntanmile; sputun baja ke tu'n tipumala, ex che najxwit tu'na. Aya Nman colol ki'je. 12In che binchan il ti'j tcyakilju in cyma'n; che tpresin ocxa ke tu'nju cynimbil cyib ex tu'nju yol in baj cyjuramentin mya ax toc. 13Byo'n cuba ke tu'n tk'oja, byo'n cuba ke tu'n mi'n cucx cyank'in; tu'ntzun tel cynic' xjal ti'j ka ate Dios in cawin cyibaj aj Israel ex tuj tcyakil twitz tx'otx'. 14Oc cyajtz meltz'aj te konic'an in che kawin ic tza'n ke tx'yan, ex in che betje' tuj tnam, 15in che betje', in che jyon cywa, in che jaw xo'jin tu'nju minti'xix in noj cyc'u'j. 16Atzun weye, chin bitzale teya te prim; chin bitzale ti'j tc'ujlalila ex tipumala, tu'nju aya jun colbil weye ex tuc'ila in pon nclon wibe oc ntene tuj yajbil weye. 17Teya che xel nbitzane ke bitz, Nman Dios, porque aya k'ol wipumale ex aya colbil weye; aya Dios aju in c'ujlante weye.

will be added

X\