1 Nman Dios, k'ak'antz tc'u'ja wi'je, k'ak'antz tc'u'ja wi'je, o'cx ti'ja k'ukl nc'u'je. Waje tu'n nclonte wibe cyjak' ke t-xic'a ocxi tbaj xobajil. 2 In chin cubsane twitz Dios aju Dios Ma'xix Toclen, aju in onin weye tuj tcyakil. 3 Max tuj cya'j ctzajel t-sama'n Dios tc'ujlalil ex aju tyol axix toc, ex oc chin cletele tu'n cye keju in che yajlante weye. 4 Palch cub kine twitz tx'otx' cyxol ke xjal ic cyten ic tza'n ke balun ba'n che chyo'n xjal; ic tten twitz cye' ic tza'n ke lans ex ke plech, ex ic tten cytzi' ic tza'n jun spad banin ttzi'. 5 Nman Dios tcuba tibaj cya'j. Nojni twitz tx'otx' tu'n tajwalila. 6 Ke aj k'oj wi'je ma cub cyk'o'n jun c'obil wi'je tu'ntzun ttzaj baj nc'u'je; cu'x cylacu'n jun jul tuj nbeye, pero ax ke e je'x tz'ak tuj. 7 Banin tten wanmiye Nman Dios, banin tten wanmiye tu'n cyxi tbitzan ke bitz te teya. 8 K'i'mel twatla wanmiye; cyi'mel cywatle chnab arpa ex quitar; oc chin jawil we'ye na'nxtok ttzaj t-xe cya'j. 9 Nman, cjawil nnimsa'na tuc'il bitz cyxol ke tnam ex ke nasyon. 10 Porque ma'xix tc'ujlalila ic tza'n cya'j; ex aju tyola axix toc max in japun canun twitz cya'j. 11 Nman Dios tcuba tibaj cya'j. Nojni twitz tx'otx' tu'n tajwalila.
