SALMOS 56

1K'ak'antz tc'u'ja wi'je Nman Dios porque lepcho'c ke xjal wi'je tu'n ncub cybyo'n. Ex tcyakil k'ij in che oc tzokpaj wi'je ex in chin baj yajla'ne cyu'n. 2Tcyakil k'ij lepcho'c ke aj k'oj wi'je tu'n ncub cybyo'n; nimcu cybaj keju in che oc tzokpaj wi'je tuc'il cynimbil cyib. 3Ka ma tzaj nxobile, nno'c ke' nc'u'je ti'ja. 4K'ukl nc'u'je ti'j Dios ex in jaw nnimsa'ne tyol; k'ukl nc'u'je ti'j Dios ex minti' in chin xobe. ¿Ti jacu tbincha xjal wi'je? 5Tcyakil k'ij in chin yajlanjtze cyu'n tu'n yol; o'cx in che ximan ti'j tu'n cybinchante mya ba'n wi'je. 6Nok jachak in xi cyewan cyib tu'n ntzyete cyu'n, in che que'yin wi'je jatum in chin bete, in che ayon wi'je tu'n ncub cybyo'n. 7K'on cuba cycastiw ti'j cybinchben mya ba'n. Nman Dios, xitun cuba ke tnam tu'n tk'oja. 8K'i'n tajlal tu'na jte' majxi chin el oke; in jaw ti'na teyle junjun txut ta'l nwitze. ¿Myapetzun tz'iban ke jlu tu'na tuj u'j at tuc'ila? 9Che elel ok ke aj k'oj wi'je oc t-xi nkanine onbil te Dios. Ba'n wu'ne at Dios wuc'ile te onil weye. 10K'ukl nc'u'je ti'j Dios ex in jaw nnimsa'ne tyol; k'ukl nc'u'je ti'j Kman ex in jaw nnimsa'ne tyol. 11K'ukl nc'u'je ti'j Dios ex minti' in chin xobe. ¿Ti jacu tbincha xjal wi'je? 12Aju yol xi ntziyane teya Nman Dios, cjapunel wu'ne tuc'il ak'bil chjonte teya, 13tu'nju ma chin clete tu'na te camic, ma chin clete tu'na tu'n mi'n ncub tz'ake, tu'ntzun nbete twitza tuj spic'un cyxol ke xjal itz'.

will be added

X\