SALMOS 55

1Nman Dios bintza aju nna'j Diose; mi'n nok tzaj tbi'na ncubsbile twitza. 2Chin tbintza ex chin ttzak'wentza; ma baj nc'u'je tu'nju bis in tzaj wi'je. 3In chin jaw lu'lune tu'n tk'ajk'ajel cywi' aj k'oj wi'je ex tu'nju yajbil weye cyu'n ke xjal mya ba'n. Cyu'n ma tzaj yajbil wi'je; in che oc tzokpaj wi'je tuc'il cytx'u'jil. 4In putin wanmiye ttzi nxu'que; ma tzaj t-xobil camic wi'je. 5Ma tzaj nimxix t-xobil wi'je; in chin lu'lune tu'n nxobile. 6Ex in nma'ne cyja': Nokwit at nxic'e ic tza'n jun paloma, jaculo chin el putine ex jaculo chin ojlane. 7Jaculo chinx oke najchak wen; jaculo chin cyaj tene najal tuj lugar minti' cynajbil xjal tuj. 8Juratlo jacu chinxe clol wibe oc ttzaj xobajil tu'n cyk'ik' jbal. 9Xitun cuba ke Nman, tzpet-san baja cyyol, porque o'cx in wile c'ixbisabl ex ic'bil tuj tnam, 10k'ijtl ex konic'an txolin cyten ti'jele tnam. O'cx mya ba'n ex yajbil at tuj; 11nojni ke cay cyu'n ke xjal c'ixbisal ex sbul. 12Nokwit jun aj k'oj ma binchante mya ba'n wi'je, mawtlo tzic'x wu'ne; ex nokwit jaw ti'n tib wi'je aju nne'l ic'unte weye, mawtlo tz'el wewan wibe twitz. 13Pero aju ma jaw ti'n tib wi'je, acuya aju wuc'ile ex mejorxix wamiwoye, 14tuc'ila oc njunin wibe tuj tja Dios tu'ntzun kyolin kamiwxix kib, ex tuc'ila o chin bete cyxol nimcu xjal. 15Cuchiwt minaben che cyim ke aj k'oj wi'je. Itz'xwit ke oc cycu'pun tuj cynajbil cyimni, porque o'cx mya ba'n at tuj cyanmi. 16Atzun weye oc chin cubsale twitz Kman Dios; ate cclolte weye. 17Te prim, te kale ex te konic'an, chin jawil ayayane ex chin jawil ok'e, ex ctzajel tbi'n tk'ajk'ajel nwi'ye, 18chin cletele tu'n oc toc k'oj wi'je; masque at nim aj k'oj wi'je chin cletele tu'n. 19Ate Dios aju in cawin te jumajx, chin tzajel bi'ne tu'n ex cbel cyi'j ke aj k'oj wi'je tu'n, porque minti' in baj cych'expu'n cymod, ex minti' in che xob twitz Dios. 20In jaw cyi'n cyib cyi'j ke cyamiw; minti' in japun cyu'n aju yol in xi cytziyan te cymojbabl cyib. 21Tbanilxix cybinx ke yol in che ajben cyu'n, atzunju cyximbetz o'cx cyaj tu'n cyk'ojin. Tbanilxix cybinx ke yol in che ajben cyu'n, pero ic cyten ic tza'n spad banin ttzi'. 22K'oncja ke tbisa tuj tk'ab Kman, ate ctzajel k'onte tipuna tu'n tic'x tu'na, mlayx tak' ambil tu'n tcub tz'ak aju xjal ba'n niman te. 23Nman Dios, tu'na che pol tz'ak ke byol xjal ex ke nic'al yol max t-xe'pun cynajbil cyimni, mlay tak'a ambil cye tu'n cyank'in nim k'ij. Atzun weye k'ukl nc'u'je ti'ja.

will be added

X\