1 In yolin Kman Dios aju ma' toclen cywitz keju nno'c cydiosin xjal, in txocon cyi'j ke xjal najl ke twitz tx'otx' tzajnix tuj tjawitz k'ij ex tu'n tpon baj tuj telex k'ij. 2 In koptz'aj Kman Dios max tuj tnam Sión, aju tnam tbanilxix. 3 Tzul Kman Dios, ex mya tuj ewaj tzul; tcubsa'n jun k'ak' twitz in tz'e'y nimcu tu'n; ex ti'jele in jumin jun nintz cyk'ik' cyuwxix wen. 4 In txocon Dios ti'j cya'j ex ti'j tx'otx' tu'ntzun tcub cycastiw ke xjal etzan tu'n, ex chi in tma'n cyja': 5 Cychmon oque ke xjal sc'o'maj ke wu'ne, akeju o bant ti'j jun cyyol wuc'ile tej ttzaj cyk'o'n jun chojbil weye, chi Dios. 6 Ate cya'j ck'malte tz'aklxixte Dios, porque axte cxel binchante cyi'j xjal. 7 Cybintze akeye aj Israel, akeye jun tnam etzan wu'ne; cxel nchic'ba'ne cyeye aju mya ba'n in cybincha'ne. Akine Dios, akine Cydiose. 8 Mlay che oc nmayo'ne cyi'j ke chojbil ex ke oyaj patun in che cub, akeju cucx ttzaj cyk'o'ne weye. 9 Minti' in xi nkanine cyeye jun tal tor cyi'j ke cywacẍe, ex mi jun tman chip cyxol keju ate' tuj cype'ne, 10 porque weye cycyakil ke txcup ate' tjak' c'ul, ax icx ke alumaj nim cyajlal ate' tuj tiwitz tx'otx'; 11 ax icx weye ke chyu'j ate' tjak' chc'ul, cyuc'ix cycyakil keju in che yucch tuj cojbil. 12 Nokwit in tzaj el nc'u'je, mlaywitlo txi nma'ne teya, porque weye tcyakil twitz tx'otx' tuc'ix tcyakilju at twitz. 13 ¿Baka in chin wa'ne ti'j cychibjal ke tor, ex baka in xi nc'ane cychc'el tman chip? 14 Aju ak'bil chjonte tu'na awt tz'ajben te jun toyaja te Dios; japunx tu'na aju yol in xi ttziyana te Dios aju ma'xix toclen. 15 Bix chin ttxoca oc ttena tuj yajbil, jacu cleta wu'ne ex atzun teya oc chin cjawil tnimsa'na. 16 Atzun teju xjal mya ba'n in tma'n Dios cyja': ¿Ti toclena ti'j tu'n tyolina cyi'j ke nleye ex tu'n tyolina ti'j ju yol cyaj bant ti'j wu'ne, 17 ex minti' in tzalaja ti'j tu'n t-xi ncawina ex minti' in xi tbi'na nyole? 18 In tc'mo'na aju elek' tuc'il tzalajbil; nno'c tjunin tiba cyuc'il ke xjal aj pajil. 19 Minti' in tjac'un tiba tu'n tyolina yol mya ba'n ex in ximana ti'j tu'n t-sbuna. 20 In yolina mya ba'n ti'j termaniya; ti'j ju tecuya terman in jaw tnic'ana yol. 21 Tcyakil jlu o tbinchaya ex minti' o chin k'ajte ti'j; cub t-ximana ka icx kine ic tza'n teya. Pero twitzcuya cbel nchic'ba'ne ke tbinchbena mya ba'n, chi Dios. 22 Tz'elx cynic'e ti'j jlu akeye nnic' tna'njtz Dios cyu'n, mya yajcu che baj npaẍu'ne ex mi a'l jun jacu colin cyi'je: 23 Aju in tzaj k'onte jun ak'bil chjonte weye, in chin jaw tnimsa'n. In clet wu'ne aju xjal in bet tuj tumelxix, chi Dios.
