SALMOS 49

1Cyk'ontze cywi'ye ti'j jlu, akeye xjal najl tuj tcyakil twitz tx'otx', 2tza'nx ke k'inun icx ke meba, ex tza'nx keju ma' cyoclen icx keju ch'in cyoclen. 3Chin yolile ti'j jun yol at tnabl, cxel nchic'ba'ne aju ximbetz ma' t-xilen: 4c'oquel nk'o'ne nwi'ye cyi'j ke yol in cyk'o'n xnak'tzbil, ex cxel nchic'ba'ne aju yol cwest tu'n tel cynic' xjal ti'j, oc toc nk'ajtza'ne chnab arpa. 5¿Tiku'n chin xobile oc tul canun tk'ijlalil mya ba'n, oc tbaj txolin wi'je cyu'n aj k'oj wi'je?, 6akeju nno'c ke' cyc'u'j ti'j cyk'inumabl ex in jaw cyniman cyib tu'nju nim at cye. 7Pero mi jun xjal jacu bant tclonte jun tuc'il ex mlay bant t-xi tchjo'n te Dios tu'n tclet. 8Masque at nim tpwak, pero mlay lak'et tchwinklal tuc'il tu'n, 9tu'n tank'in te jumajx ex tu'n mi'n tcyim. 10Porque ba'n ku'n cycyakil in che cyim, tza'nx keju at cynabl icx keju minti' cynabl, ex aju cyk'inumabl in cyaj ten te juntl. 11Masque tz'oc cyk'o'n tbi cytx'otx' ic tza'n cye cybi, pero atzun che tel cyxol ke cyimni te jumajx. 12Masque at nim tk'inumabl jun xjal, pero mya tu'n jlu mi'n cyim; icx cymel ic tza'n in che cyim ke txcup. 13Cyja'tzun, che najel keju nno'c ke' cyc'u'j cyi'jx, cyuc'ix keju lepch ke cyi'j ex in che tzalaj ti'j cyyol. 14A camic pastor cyi'j ke xjal lu, ex in che'x ẍaklu'n tu'n tuj cynajbil cyimni mer ic tza'n ẍne'l. Oc ttzaj t-xe cya'j cbel cyi'j cyu'n keju tz'aklxix, porque cyja' tbaj cyipun ex atzun che pol najal tuj cynajbil cyimni. 15Pero ate Dios colol wi'je tuj tipumal camic, ex chin xel k'i'ne tu'n, tu'n ntene tuc'il. 16Mi'n tzaj tbisa ka at jun xjal ma tz'oc te k'inun ex mas ba'n nno'c que'yin tja tu'n tk'inumabl, 17porque oc tcyim mi jun ti'xti cxel ti'n, ex mlay txi lpe' tk'inumabl ti'j tuj cynajbil cyimni. 18Masque nim in tzalaj acux itz'x tzalu twitz tx'otx', ex masque in che yolin xjal ba'n ti'j tu'nju at tk'inumabl, 19pero cpol tk'ijlalil tu'n tcyim, ex mlay tz'oc tque'yin juntl maj t-spic'umal k'ij. 20Masque at nim tk'inumabl jun xjal, pero mya tu'n jlu mi'n cyim; icx cymel ic tza'n in che cyim ke txcup.

will be added

X\