1 A Dios colol ki'j ex k'ol kipumal; a onil ke tuj k'ij oc ttzaj yajbil ki'j. 2 Cyja'tzun mlay ko xob masque baj yucch tx'otx', ex masque cyja' cyxi' baj ke witz tuj mar tu'n cycu'pun max t-xe', 3 masque julin mar wen ex masque pulin wen, ex masque che lu'lun ke witz tu'n cytx'u'jil. 4 At jun nima in ttzalajsa'n ke xjal ate' tuj tnam cub tbincha'n Dios, aju tnam lu mas xjanxix ex toc te tnajbil Dios, aju Dios Tajaw Tcyakil. 5 Tuj tnam lu atzun ta' Dios, cyja'tzun mlay yucch; ex ax Dios onil te oc tcub spic'e'. 6 In che tzanun ke nasyon ex in che lu'lun ke cawbil, ex in cub ulj tx'otx' oc ttzaj k'ajt Dios. 7 Ate Kman aju Tajaw Tcyakil at kuc'il. Ate Dios colol ki'j, aju Tdios Jacob. 8 Cytzaje ex cyque'yinxe aju xobajilxix ma tbincha Kman twitz tx'otx'. 9 Ma we' tcyakil k'oj tu'n tuj tcyakil twitz tx'otx', ma che cub ttokan ke xobl plech cyuc'ix ke lans, ex ma tz'oc tk'o'n cyk'ak'al ke carwaj in che ajben tuj k'oj. 10 Chi Dios: Cycolinxe tu'n cyk'ojine, tz'elx cynic'e wi'je ka akine Dios. Akine nejenel cyibaj cycyakil nasyon. Ex akine nejenel cyibaj cycyakil xjal ate' twitz tx'otx'. 11 Ate Kman aju Tajaw Tcyakil at kuc'il. A Dios colol ki'j, aju Tdios Jacob.
