SALMOS 45

1Tuj wanmiye in che jatz ke yol tbanilxix. Aju ntzi'ye ic tten ic tza'n jun lapis in ajben tu'n jun xjal ba'nxix tz'iban. Cxel nbitzane jun nbitze twitz ju rey. 2O'cxcu aya tbanilxix cyxol cycyakil xinak. Tbanilxix cycyakil ke yol in tma'na. Cyja'tzun te jumajx ma cub cy'iwla'na tu'n Dios. 3K'onca t-spadiya tc'u'ja, aya cyuw tc'u'j tuj k'oj. K'onc tajwalila in koptz'aj wen. 4Tjaxa tuj carwaj te k'ojbil ex txi'ya tu'n tcambana, tz'oc tilil tu'na tu'n tcyuwsanjtz ju yol axix toc ex tu'n t-xi binchet cyi'j ke xjal mans ke. Tu'n tbank'aba che bantel ke binchben ma'xix cyxilen. 5Oc che bel tz'ak ke tnam twitza oc tcub cyi'j tu'na, aya rey; ke tplecha puro tz'u'p cywi' ex in che'x xuyl tuj cyanmi ke aj k'oj ti'ja. 6Aya Dios, aju tcawbila cucx cyjel ten te jumajx tuj tcyakil tabk'iyil ex tuj tumelxix in cawina. 7In tzalaja ti'j ju tz'aklxix ex nne'l tic'una aju mya ba'n. Cyja'tzun ma jaw sc'o'na tu'n Dios aju Tdiosa, ex mas ma tzalaja tu'n cywitz ke mastl tuc'ila. 8Tcyakil t-xbaluna c'oc'j ti'j tu'n perjum nne'l ti'j tze' mirra, ex ti'j tze' √°loe ex ti'j tze' canela; ex in tzalaja tu'n tk'ajk'ajel cywi quitar cyuj tja rey lo'tzin marfil twitz cycajonil te tujxi. 9Cyxol ke xu'j at cyoclen ate' ttxlaja, ate' ke cyme'jel rey; ex tuj tbank'aba, atzun tcubsa'n aju t-xu'jila tocsa'n k'an pwak mas tbanil ti'j. 10Bintza nme'jel, k'onca cwent ti'j aju cxel nma'ne teya: K'i'mela ti'j tc'u'ja keju ate' tuj tja tmana ex ke t-xjalila. 11Ma pon tc'u'j rey ti'ja tu'nju tbanilxix que'yina; nimana te, tu'nju atzun tajwila. 12Ke xjal aj Tiro cyuc'ix ke xjal k'inun ate' tuj tnam, ctzajel cyk'o'n oyaj teya tu'n cycambante t-xtalbila. 13Tbanilxix que'yin tme'jel rey tocx tuj tja. Aju t-xbalun toc puro k'an pwak twitz. 14Tuc'il t-xbalun in koptz'aj wen cxel k'i'n twitz rey, ex cyuc'ix ke k'apoj akeju tuc'il, che oquex tuc'il. 15In che ocx k'i'n tuc'il nim tzalajbil; ex tuc'il tzalajbil in che ocx tuj tja rey. 16Ke tcy'ajala, Tat Rey, che oquel te cawil ic tza'n ke t-xe'chela, ex che oquel tk'o'na te cawil tuj tcyakil twitz tx'otx'. 17Waje tu'n ttzaj na'na cyu'n cycyakil c'loj xjal che ul itz'j te tibajxi, cyja'tzun cjawil nimsa'na cyu'n ke tnam tuj tcyakil tabk'iyil te jumajx.

will be added

X\