SALMOS 44

1Nman Dios, tu'n kẍcyine o kbiye, o tzaj cyma'n ke kmane keye ti'j ju tbinchaya tuj k'ij tej cyten ke kxe'chele, tuj tk'ijlalil ojtxi: 2tu'nx tk'aba e ex tlajo'na ke xjal mya ocslal ti'ja, cub tk'o'na cycastiw ke nasyon, ex atzun e cub tk'o'na ke kxe'chele tuj cytx'otx'. 3Mya tu'n cyex cyk'ab ex mya tu'n cyex cyspad e camban; mya cyu'nx o tzyet aju tx'otx'. O tzyet tu'n tipumala ex tu'n tk'aba ex tu'n t-xtalbila cyibaj, porque c'ujla'n ke tu'na. 4Aya nreye. Aya Ndiose. Tu'na o camban aju tnam etzan tu'na. 5Nok tu'na o cub cyi'j ke aj k'oj ku'ne, tu'n tipumala e cub tz'ak twitz tx'otx' keju e oc tzokpaj ki'je. 6Porque mlay tz'oc ke' nc'u'je ti'j xobl plech k'i'n wu'ne, ex mlay chin cambane tu'nju nspadiye; 7tu'na cub cyi'j ke aj k'oj ku'ne, ex tu'na cub cych'ixwi keju in che ic'un ki'je. 8Nok ti'ja in ko tzalaje Kman Dios, ex cucx cjawil knimsa'ne tbiya. 9Pero ma ko el tic'una; ex ma cub tk'o'na kch'ixwiye. Ex minti'tl in beta cyuc'il ksoldadiye oc cyex tuj k'oj. 10Tu'nju minti' ma tz'onina kuc'ile ma ko el oke cywitz ke aj k'oj ki'je; ex keju in che ic'un ki'je in xi cyelk'a'n aju at keye, ex in xi cyi'n nok alcye cyaj. 11Ma ko'x tk'o'na tuj cyk'ab ic tza'n jun ẍne'l in xi k'i'n tu'n tpon jatum tu'n tcub byo'n; ex ma ko baj t-sputuna cyxol ke xjal mya ocslal ke ti'ja; 12puro barat ma txi tc'a'yina ju tnam etzan tu'na, ex minti' jun ma tcambaya ti'j tu'nju ma txi tc'a'yina. 13Tu'na ma tzaj kch'ixwiye cywitz ke kvesine, ma ko oque te tzebl ex te xmaybil cyu'n keju txolin cyten ki'jele. 14Tu'na in che xmayin ki'je ke xjal mya ocslal ti'ja; ex oc koc que'yine cyu'n, in xi cyyucun cywi' te xmaybil keye. 15Tcyakil k'ij in tzaj nch'ixwiye; ex tu'n nch'ixwiye xi wewan nwitze, 16tu'n cyyol keju in che yasun ex in che ilin wi'je, ex tu'n cylaj ke aj k'oj ex keju cyaj tu'n t-xelin wi'je cyu'n. 17Ma tzaj jlu ki'je mya tu'nju mawt tzic' tna'njtza ku'ne. Bajx ko el jolpaje ti'j ju yol o cyaj bant ti'j tu'na. 18Minti' in cub kximane tu'n tcyaj kcoline, ex minti' ma che cyaj kk'o'ne ke tbeya. 19Atzun teya ma ko naje tu'na cyuj ke lugar tzkij tx'otx' minti' cynajbil xjal tuj. Ma ko cub tk'o'na tjak' jun klolj xobajilxix. 20Nokwit ma tzic' tna'njtza ku'ne, Dios, ex nokwit ma ko c'ulune twitz junxitl dios, 21mawtlo tila, porque nne'l tnic'a ti'j aju at tuj ewaj tuj tanmi xjal. 22Pero nok tu'n tlaja cucx nne'lje' ki'je tu'n kcub byo'ne; in ko oc k'o'ne ic tza'n ke ẍne'l in che cub byet. 23¿Tiku'n nnic' tana, Nman? K'i'mel twatla, k'i'mel twatla. Mi'n ko el tic'una te jumajx. 24¿Tiku'n in xi tewan tiba? ¿Tiku'n ma tzic' kna'njtze tu'na? Nimxix in ko yajlanjtze ex ato'ye tuj bis. 25Ma baj kipune ex ma tzaj kbise ex lu kximlale palch twitz tx'otx'. 26We'ctza, tzaja onil keye ex ko tcloma tu'n tc'ujlalila ma'xix.

will be added

X\